Ղարաբաղի հարցում ինտենսիվ դիվանագիտություն է պետք, մինչդեռ բանակցությունները թուլացել են. Աղասի Ենոքյան․ ՏԵՍԱՆՅՈՒԹ

Հեղափոխությունից հետո Հայաստանի արտաքին քաղաքական օրակարգում փոփոխություններ չեն նկատվել, այդ ուղղությամբ պետք է աշխատել:

Այս մասին Factor.am-ի հետ զրույցում ասաց քաղաքագետ Աղասի Ենոքյանը՝ նշելով, որ ԵԱՀԿ Մինսկի խմբում եռանախագահող երկրներից բացի Ռուսաստանից մյուս երկների հետ պետք է ավելի ինտենսիվ աշխատանք:

Հարցին՝ ինչի կհանգեցնի վերջին ամիսներին շփման գծում հակառկորդի զորքերի և զինտեխնիկայի տեղաշարժը, քաղաքագետը պատասխանեց՝պատերազմի: «Ակնհայտ է, որ նախորդ պատերազմով Ադրբեջանը չլուծեց իր առջև դրած խնդիրները, իսկ Ալիևն էլ օրեցօր ավելի մարտական հռետորաբանությամբ է հանդես գալիս»,- նշեց մեր զրուցակիցը՝ ընդգծելով, որ հայկական կողմն այդ ամենի դեմ պետք է պայքարի առաջին հերթին դիվանագիտական հարթակում:

Աղասի Ենոքյանը նշեց, որ Ղարաբաղը բանակցային կողմ դարձնելու համար շատ ինտենսիվ դիվանագիտություն է պետք, մինչդեռ ըստ քաղաքագետի՝ բանակցությունները թուլացել են: Աղասի Ենոքյանն անդրադարձավ նաև Ազգային անվտանգության ծառայության կողմից վերջին շրջանում արված աղմկահարույց բացահայտումներին՝ նշելով որ դրանք նորություն չեն:

«ԱԱԾ-ն ոչ թե բացահայտումներ է անում, այլ օպերատիվ աշխատանքի միջոցով արդյունքներն է քաղում:Ասում էին չէ՞, երբ Սերժ Սարգսյանը դուրս եկավ Բաղրամյան 26-ից, իր հետ տարավ սև ճամպրուկներ, բայց դրանց օրիգինալները մնացել են Ազգային անվտանգության ծառայությունում:

Այսինքն՝ եթե Սերժ Սարգսյանն այդ պապկաներն օգտագործում էր, որպեսզի դրա համար իրեն բերեին այն հայտնի ճամպրուկները, ապա Նիկոլ Փաշինյանը ճամպրուկներ չի ուզում, փոխարենը ԱԱԾ-ին առաջադրանք է տվել դրանց միջոցով բացահայտել նրանց կատարած հանցագործությունները»,- նշեց Ենոքյանը: Ըստ քաղաքագետի՝ մարդիկ այժմ չեն հասկանում, որ մասն է պետությունից գողացվածը, որ մասը՝ իրենցը. «Այդ մարդկանց հետ պետք է առանձին աշխատվեր, ասվեր»:

Հարցազրույցն ամբողջությամբ՝ տեսանյութում:

Շողիկ Գալստյան