Ջհանգիրյան-Վարդազարյան ձայնագրության վերաբերյալ վարույթը կարճվել է, Դատախազությունը հաստատել է որոշումը

Լուրեր

15.11.2026 | 22:05
Եղիշե Մելիքյանն ամփոփել է Ազգերի լիգայի վերջին խաղը. ՏԵՍԱՆՅՈՒԹ
15.11.2026 | 21:49
Փաշինյանը Կամբոջայում մասնակցել է Ֆրանկոֆոնիայի գագաթնաժողովի մասնակիցների պատվին տրված ընթրիքին
15.11.2026 | 20:27
Էստոնիան դեկտեմբերի 1-ից կփակի Ռուսաստանի հետ սահմանային բոլոր անցակետերը
15.11.2026 | 20:00
Թանկ շենքեր, էժանագին կառավարում․ ո՞ւր են գնում բնակիչների փողերը․ ՏԵՍԱՆՅՈւԹ
15.11.2026 | 19:53
Ազգերի լիգա. Հայաստանի հավաքականը ոչ-ոքիով ավարտեց պայքարը
15.11.2026 | 19:45
Nvidia-ի նախկին ղեկավար Ջենսեն Հուանգը սկանդալի հետևանքով կորցրել է 62 միլիարդ դոլար
15.11.2026 | 19:16
Փաշինյանը Կամբոջայում այցելել է Ֆրանկոֆոնիայի ավանում բացված Հայաստանի տաղավար
15.11.2026 | 18:56
Սևանում սիգի որսի արգելքի խախտման համար նախատեսված է վարչական և քրեական պատասխանատվություն
15.11.2026 | 17:56
Փաշինյանը Ֆրանկոֆոնիայի գագաթնաժողովում խոսել է հայ-ադրբեջանական խաղաղության գործընթացից
15.11.2026 | 17:19
Փաշինյանն ու Մոլդովայի վարչապետը քննարկել են Երևան-Քիշնև ուղիղ ավիաչվերթների կազմակերպման հարցը
15.11.2026 | 17:03
Էդգար Սևիկյանը լքել է Հայաստանի հավաքականի ճամբարը և հանդիպման է մասնակցում «Սուետայի» կազմում
15.11.2026 | 16:47
Ազգերի լիգա. Հայաստանի հավաքականի մեկնարկային կազմը Լատվիայի դեմ խաղում
15.11.2026 | 16:36
Դատավորների նկատմամբ քրեական հետապնդում է հարուցվել
15.11.2026 | 16:16
Նոյեմբերի 20-ից Սևանա լճում կարգելվի սիգի արդյունագործական որսը
15.11.2026 | 15:23
ՀՀ ԱԳՆ-ն շնորհավորել է Պաղեստինին Անկախության օրվա առթիվ․ արձագանքել է նաև Իրանի դեսպանությունը
Բոլորը

Հակակոռուպցիոն կոմիտեն հանցադեպքի բացակայության հիմքով կարճել է Բարձրագույն դատական խորհրդի նախկին նախագահ Ռուբեն Վարդազարյանի և ԲԴԽ նախագահի նախկին ժամանակավոր պաշտոնակատար Գագիկ Ջհանգիրյանի միջև խոսակցության ձայնագրության դեպքով վարույթը։ Դատախազության հանրային կապերի բաժնի պետ Արևիկ Խաչատրյանը Factor. am-ի հարցին ի պատասխան ասաց, որ որոշումը ստուգվել և հաստատվել է։

Հիշեցնենք, որ 2022 թվականի հունիսի 20-ին հրավիրած մամուլի ասուլիսի ժամանակ ԲԴԽ նախկին նախագահ Ռուբեն Վարդազարյանը հրապարակել է մի ձայնագրություն, որում Գագիկ Ջհանգիրյանը նրան հորդորում է հրաժարվել ԲԴԽ նախագահի պաշտոնից: Խոսակցությունը տեղի է ունեցել 2021 թվականի փետրվարին՝ այն ժամանակ, երբ Ջհանգիրյանն արդեն ընտրվել էր ԲԴԽ անդամ, իսկ Ռուբեն Վարդազարյանը ԲԴԽ նախագահն էր:

Վարդազարյանը ձայնագրության մեջ խոսում է այն մասին, որ իր վերաբերյալ հարուցված գործեր կան, որ մեկ օր առաջ է խոսել գլխավոր դատախազի հետ, Ջհանգիրյանն էլ փորձում է վստահեցնել, որ ընդամենը մեկ գործ է հարուցված:

«Հաշվի՝ չկա, էն առաջինն էլ չկա»,- ասում է Ջհանգիրյանը, որից հետո Ռուբեն Վարդազարյանը տարակուսանքով հարցնում է՝ այսինքն Ջհանգիրյանն այնքան հզոր է, որ գլխավոր դատախա՞զ է կառավարում:

«Ապե՛ր, ես պրեզիդենտ էլ եմ կառավարել դու էդ ի՞նչ կարծիքի ես իմ մասին»,- պատասխանում է Ջհանգիրյանը: Վերջինս նաև վստահեցնում է, որ թույլ չի տվել Վարդազարյանի նկատմամբ երկրորդ, երրորդ գործերը հարուցվեն:

«Էդ բոլորը կանգնեցված ա, և ես գարանտ եմ: Ես, տես, սաղ փակել եմ, էս պահին ոչ մի բան չի գնում՝ սկսած Վահագնի գործից վերջացրած մյուսներով»,- կրկին վստահեցնում է Գագիկ Ջհանգիրյանը: Ձայնագրությունից պարզ է դառնում, որ հանդիպմանը մասնակցում է նաև ԲԴԽ անդամ Ստեփան Միքայելյանը։

Այս խոսակցությունից կարճ ժամանակ անց՝ 2021-ի ապրիլին Ռուբեն Վարդազարյանին մեղադրանք է առաջադրվել արդարադության իրականացմանը խոչընդոտելու հոդվածով։ Ըստ գործի՝ Վարդազարյանը փորձել է Լոռու մարզի ընդհանուր իրավասության դատարանի դատավոր Անդրանիկ Սիմոնյանին համոզել կալանքից ազատ արձակել «Ալավերդցի Վահագն» անունով հայտնի Վահագն Աբգարյանին։

Գործի հարուցումից հետո Վարդազարյանի լիազորությունները՝ որպես ԲԴԽ նախագահ, կասեցվել են, ու ԲԴԽ նախագահի ժամանակավոր պաշտանակատար է նշանակվել Գագիկ Ջհանգիրյանը, որը, սակայն, ձայնագրություն հրապարակումից հետո հրաժարական է տվել։

Ռուբեն Վարդազարյանի կողմից ձայնագրության հրապարակումից հետո Գագիկ Ջհանգիրյանը ԲԴԽ լրատվական ծառայության միջոցով հայտարարություն է տարածել, որ հացի սեղանի շուրջ խոսակցությունները չի մեկնաբանում:

Բայց հետագայում մեկնաբանել ու հայտնել է, թե, «կուտ է տվել» Ռուբեն Վարդազարյանին, որն իր երբեմնի ուսանողն է:

Հանրային հեռուստաընկերության եթերում, անդրադառնալով ձայնագրության բովանդակությունը, Ջհանգիրյանը հայտնել է, որ քրեական գործեր կարճելու մասին իր հայտարարությունը հոգեբանական հնարք է եղել:

«Կուտ եմ տվել, ժողովրդի լեզվով ասած։ Ես ո՞նց եմ հարուցել կամ կարճել տալիս այդ քրեական գործերը. իմ լիազորություններից դուրս բաներ են»,- ասել է Ջհանգիրյանը։

Ձայնագրության հրապարակումից հետո Քննչական կոմիտեում քրեական վարույթն է նախաձեռնվել՝ ՀՀ քրեական օրենսգրքի 441-րդ հոդվածի 1-ին մասով (Պաշտոնատար անձի կողմից իր իշխանական կամ ծառայողական լիազորությունները կամ դրանցով պայմանավորված ազդեցությունն ի վնաս պետական կամ ծառայողական շահերի օգտագործելը կամ իր ծառայողական պարտականությունը չկատարելը կամ ոչ պատշաճ կատարելը կամ այնպիսի արարք կատարելը, որը չի բխում իր լիազորություններից կամ դուրս է իր լիազորությունների շրջանակից, որն էական վնաս է պատճառել անձի կամ կազմակերպության իրավունքներին, ազատություններին կամ օրինական շահերին կամ հասարակության կամ պետության օրինական շահերին) և 486-րդ հոդվածի 2-րդ մասի 2-րդ կետով (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով՝ արդարադատության կամ որպես դատարան` օրենքով նախատեսված այլ լիազորությունների իրականացումը խոչընդոտելու նպատակով դատարանի գործունեությանը կամ գործի քննությունը խոչընդոտելու նպատակով դատախազի, քննիչի, քննչական մարմնի ղեկավարի, հետաքննության մարմնի, փաստաբանի կամ ներկայացուցչի գործունեությանը ցանկացած ձևով միջամտելը)։

Այս շրջանում գլխավոր դատախազն Արթուր Դավթյանն էր, ում անունը, փաստացի, նույնպես շոշափվում էր ձայնագրության մեջ։ Դավթյանի դատախազ եղած ժամանակ գործը քննվում էր Քննչական կոմիտեում, որը մի քանի ամիս քննելուց հետո որոշեց կարճել այն։

Արթուր Դավթյանի պաշտոնավարման ժամկետի ավարտից հետո գլխավոր դատախազ դարձած Աննա Վարդապետյանը, սակայն, վերացրեց կարճման որոշումն, ինչպես նաև փոխեց գործի քննչական ենթակայությունը։ Գործը Քննչական կոմիտեից տեղափոխվեց Հակակոռուպցիոն կոմիտե։ Այս ժամանակ պարզ դարձավ, որ գործին ինչ-որ առնչություն ունեն նաև ԲԴԽ անդամներ Սերգեյ Չիչոյանն ու Վիգեն Քոչարյանը, քանի որ դատախազ Աննա Վարդապետյանը վերացրել էր ոչ միայն Ջգանգիրյանի, այլև Սերգեյ Չիչոյանի և Վիգեն Քոչարյանի նկատմամբ քրեական հետապնդում չիրականացնելու մասին որոշումները։ Քոչարյանն ու Չիչոյանը մինչև այսօր չեն բացահայտել իրենց առնչությունը վարույթին։

Նշենք, որ ձայնագրության առթիվ նախաձեռնված վարույթը Հակակոռուպցիոն կոմիտեում քննվում էր շուրջ 6 ամիս։ Ռուբեն Վարդազարյանը մեզ հետ զրույցում ասաց, որ այս ընթացքում իր մասնակցությամբ որևէ քննչական գործողություն չի իրականացվել։ Հատկանշական է այն հանգամանքը, որ չնայած Վարդազարյանի և Ջհանգիրյանի ցուցմունքներում առկա են հակասություններ, նրան չեն առերեսվել ո՛չ Քննչական կոմիտեում և ո՛չ էլ Հակակառուպցիոն կոմիտեում գործի քննության ընթացքում։ Հատկանշական է նաև այն, որ Հակակոռուպցիոն կոմիտեն նախաձեռնված վարույթը կարճել է հանցադեպի բացակայության հիմքով՝ այսինքն՝ հրապարակված ձայնագրության և ոչ մի դրվագում առկա չէ հանցագործության որևէ դեպք։

 

Արաքս Մամուլյան