13.09.2026 | 15:08
Tour of Armenia-ի եզրափակիչ՝ չորրորդ մրցափուլը Երևանում
Իսրայելում պաշտոնապես բացվել է Ադրբեջանի դեսպանատունը
Քաղաքականություն
30.03.2023 | 13:37
Իսրայելի Թել Ավիվ քաղաքում նախօրեին տեղի է ունեցել Ադրբեջանի դեսպանատան բացման պաշտոնական արարողությունը, գրում են ադրբեջանական ԶԼՄ-ները։
Նշվում է, որ միջոցառմանը մասնակցել են Ադրբեջանի ԱԳ նախարար Ջեյհուն Բայրամովը, Իսրայելի ԱԳ նախարար Էլի Քոենը, ինչպես նաև երկու երկրների խորհրդարանների, հասարակության և արվեստի ներկայացուցիչներ։
Ելույթ ունենալով միջոցառմանը՝ Ջեյհուն Բայրամովը նշել է, որ դեսպանատան բացումը նոր լիցք կհաղորդի երկու երկրների հարաբերությունների զարգացմանը։
Արարողությունը պատմական իրադարձություն անվանելով՝ Իսրայելի ԱԳ նախարար Էլի Քոենն ընդգծել է, որ 30 տարվա համագործակցությունից հետո դեսպանատան բացումը վկայում է ռազմավարական կապերի խորության մասին։ Ադրբեջանին Իսրայելի ռազմավարական գործընկեր անվանելով՝ նա նշել է երկու երկրների սերտ համագործակցությունը տարբեր ոլորտներում ու համոզմունք հայտնել, որ այդ հարաբերություններն ավելի կխորանան։
Հիշեցնենք, որ նոյեմբերին Ադրբեջանի Միլի Մեջլիսն Իսրայելում դեսպանատուն բացելու որոշում էր ընդունել, որը մեծ ոգևորությամբ էր ընդունվել Իսրայելի իշխանությունների շրջանում։ Ադրբեջանի ԱԳ փոխնախարար Ֆարիզ Ռզաևը դեկտեմբերին պաշտոնական այցով մեկնել էր Իսրայել՝ վերահսկելու Թել Ավիվում Ադրբեջանի դեսպանատան բացման նախապատրաստական աշխատանքները։
Իսրայելում Ադրբեջանի առաջին դեսպան է նշանակվել Մուխտար Մամեդովը։
Էմմա Չոբանյան
