22.11.2024 | 22:17
Հարավային Կորեան հայտնում է, որ ՌԴ-ն ՀՕՊ համակարգեր է փոխանցել ԿԺԴՀ-ին
Թուրքիայում երկրաշարժից տուժած սիրիացի փախստականները նաև խտրականության են բախվում
Քաղաքականություն
24.03.2023 | 23:30
Թուրքիայում բնակվող սիրիացի փախստականները, որոնք կորցրել էին իրենց տներն ու հարազատներին պատերազմի պատճառով հայրենիքում, տառապանքներ ապրեցին թուրքական նահանգներում տեղի ունեցած երկրաշարժերի պատճառով, գրում է Gercek News-ը։
Նշվում է, որ Մարաշի երկրաշարժերից հետո միլիոնավոր մարդիկ շարունակում են պայքարել տարրական ռեսուրսների և հատկապես վրանների բացակայության դեմ: Այնուամենայնիվ, երկրաշարժից տուժածների մեջ կան մարդիկ, որոնք այս բոլոր դժվարությունների հետ մեկտեղ՝ պետք է պայքարեն նաև խտրականության դեմ:
Փախստականների իրավունքների հարթակից Յըլդըզ Օնենը, որն այցելել է երկրաշարժի գոտի՝ ծանոթանալու սիրիացիների առջև ծառացած խնդիրներին, և փախստականների իրավունքների պաշտպան, սիրիացի Թահա Էլգազին լրատվամիջոցների հետ զրուցել են երկրաշարժից տուժածների խնդիրների մասին: Նշելով, որ Թուրքիայի մոտ 4 միլիոն սիրիացիների շուրջ կեսն ապրում է երկրաշարժի գոտում, Օնենն ընդգծել է, որ մեծ դժվարությունների են հանդիպում հատկապես կանայք։
«Անհավանական պատմություններ կան. օրինակ՝ զրուցեցինք 18-ամյա սիրիացի կնոջ հետ։ Նա թուրքերեն չգիտեր։ Այս երիտասարդ կնոջը բերել են Սիրիայից՝ ամուսնանալու նպատակով։ Ամուսնու առաջին կինը մահացել էր։ Մահացած կնոջից 5 տարեկան երեխա կա։ Երբ ամուսինը մահացել է երկրաշարժի հետևանքով, 18-ամյա սիրիացի կինը և 5-ամյա երեխան մնացել են միայնակ։ Նա նաև կորցրել է իր ընտանիքի 14 անդամներին Սիրիայում տեղի ունեցած երկրաշարժի հետևանքով»,- պատմել է նա։
Յըլդըզ Օնենը նկարագրել է խտրականությունը, որին ականատես է եղել երկրաշարժի գոտում։
«Մինչ մենք այնտեղ էինք՝ մի քաղաքական կուսակցության մարզային կազմակերպություն երեխաների համար քաղցր բամբակ էր բերել: Մինչ երկու սիրիացի կանանց հետ զրուցում էինք, մեզ մոտեցավ մի հղի կին՝ երեք տարեկան երեխայի հետ միասին: Ըստ երևույթին, նրանք հերթ էին կանգնել բամբակե քաղցրավենիքի համար։ «Նրանք դա տվեցին թուրքերեն խոսողներին, բայց ոչ մեզ»,- ասաց կինը: Հետո սիրիացի մի տղա վերցրեց երեք տարեկան երեխային և վերադարձավ քաղցր բամբակով, որովհետեւ թուրքերեն գիտեր»,- ասել է նա։
Փախստականների իրավունքների հարցերով զբաղվող ակտիվիստ Թահա Էլգազին էլ նշել է, որ փետրվարի 6-ի երկրաշարժից տուժած սիրիացի փախստականներն այդ ժամանակից ի վեր չեն կարողացել բավարարել նույնիսկ իրենց ամենատարրական կարիքները՝ խտրականության պատճառով։
«Ցանկացած ճամբարում նրանք վախ են ապրում նույնիսկ ճաշի հերթում կանգնելիս: Մտավախություններ կան՝ «ինչ-որ մեկը կարող է մեզ նկարել», «ինչ-որ մեկը կարող է մեզ ինչ-որ բան ասել»: «ինչ-որ մեկը կարող է ասել՝ սիրիացիները թուրքերից ապուր են վերցնում, մեզանից խլել են ամեն ինչ»,- ասել է Էլգազին՝ նշելով, որ երկրաշարժից առաջ փախստականներն արդեն ճնշված և անտեսված խումբ էին, և դա ավելի բարդացավ երկրաշարժից հետո, քանի որ կառավարությունն այլևս չի մտածում փախստականների մասին։
Էմմա Չոբանյան
