12.09.2026 | 11:35
15-ամյան Անի Գևորգյանը սեպտեմբերի 11-ին դուրս է եկել տնից և չի վերադարձել․ ՆԳՆ
Ֆրանսիայում բողոքի ցույցերի ֆոնին Մակրոնը հրաժարվել է ցրել խորհրդարանը կամ հրաժարական տալ․ Le Parisien
Քաղաքականություն
21.03.2023 | 19:13
Ֆրանսիայի նախագահ Էմանուել Մակրոնը երկրում բողոքի ցույցերի ֆոնին մտադիր չէ ցրել խորհրդարանը կամ փոխել կառավարությունը։ Այս մասին գրում է Le Parisien պարբերականը՝ հղում անելով Ելիսեյան պալատում սեփական աղբյուրին։
Հրատարակության զրուցակցի խոսքով՝ Ֆրանսիայի առաջնորդը չի նախատեսում նաև կենսաթոշակային բարեփոխումների վերաբերյալ հանրաքվե անցկացնել, ինչպես պահանջում են ցուցարարները և ընդդիմության որոշ անդամներ։
Այսօր ավելի վաղ Մակրոնը հանդիպում է ունեցել վարչապետ Էլիզաբեթ Բորնի և մի շարք նախարարների հետ։
Ֆրանսիայի բնակիչները երեքշաբթի գիշերը դուրս են եկել բազմաթիվ քաղաքների փողոցներ՝ դժգոհություն հայտնելով կենսաթոշակային բարեփոխումների հաստատման առնչությամբ այն բանից հետո, երբ պատգամավորները չկարողացան անվստահություն հայտնել գործող կառավարությանը։
Շատ քաղաքներում ակցիաներն ուղեկցվել են անկարգություններով, մասնավորապես՝ Փարիզում և Ստրասբուրգում։ Ցուցարարները հրկիզել են աղբի տարաները, կոտրել գովազդային վահանակներ, ջարդել ցուցափեղկեր։ Ցուցարարների շրջանում հնչել են կարգախոսներ՝ Մակրոնին ու Բորնին հրաժարականի կոչ անելով։
Նախօրեին Ֆրանսիայի Ազգային ժողովը քվեարկեց կառավարությանն անվստահություն հայտնելու հարցի վերաբերյալ։ Սակայն ֆրանսիական խորհրդարանական ընդդիմությունը չկարողացավ ապահովել անհրաժեշտ մեծամասնությունը՝ կենսաթոշակային բարեփոխումների պատճառով անվստահություն հայտնելու համար։ Արդյունքում ֆրանսիացիների կենսաթոշակային տարիքը 62 տարեկանից բարձրացավ 64-ի։ Այժմ կենսաթոշակային բարեփոխումը համարվում է Ազգային ժողովի կողմից ընդունված։
Տաթև Ֆռանգյան
