Ալիևը հերթական կեղծ թեզերն է հնչեցրել Թյուրքալեզու պետությունների գագաթնաժողովում

Ադրբեջանի նախագահ Իլհամ Ալիևն այսօր Անկարայում ընթացող Թյուրքալեզու պետությունների կազմակերպության գագաթնաժողովում հերթական կեղծ հայտարարություններն է հնչեցրել Հայաստանի վերաբերյալ։ Նա մեղադրել է Հայաստանին Արցախում, իբր, զորքեր պահելու մեջ։

«Թեև Հայաստանը ճանաչել է Ադրբեջանի տարածքային ամբողջականությունն ու ինքնիշխանությունը Պրահայում և Սոչիում 2022 թվականի հանդիպումներում, դեռևս ամբողջությամբ դուրս չի բերել իր զորքերն «Ադրբեջանի տարածքներից»։ Հայկական անօրինական կազմավորումներն ու հանցավոր տարրերը մնում են Ղարաբաղում»,- ասել է Ալիևը։

Բավական երկար դադարից հետո Ալիևը հիշել է նաև գոյություն չունեցող «Զանգեզուրի միջանցքի» մասին։

«Հայաստանը խուսափում է նաև «Զանգեզուրի միջանցքի» բացման պարտավորությունից։ Այսպիսով, Հայաստանը կոպտորեն խախտում է 2020 թվականի նոյեմբերի 9-ի հայտարարությունը և պետք է պատասխանատվություն կրի դրա համար»,- ասել է Ադրբեջանի նախագահը։

Նա շարունակել է նաև Բաքվի կողմից տարածվող քարոզչական թեզը ԽՍՀՄ տարիներին Հայաստանում ապրած ադրբեջանցիների մասով։

Հավելենք, որ Բաքվի այս քարոզչության հիմնական նպատակը, արցախահայության իրավունքների և անվտանգության ապահովման համար միջազգային մեխանիզմներ ստեղծելու Հայաստանի պահանջներին ի պատասխան, Երևանին հայելային պահանջներ ներկայացնելն է։

Էմմա Չոբանյան