Քաղաքականություն
16.03.2023 | 13:10
Սիրիայի նախագահ Բաշար Ասադը ՌԻԱ Նովոստիին տված հարցազրույցում հայտարարել է, որ պատրաստ է հանդիպել Թուրքիայի նախագահ Ռեջեփ Թայիփ Էրդողանին՝ միայն իր երկրից թուրքական զորքերի դուրսբերումից հետո։
Ռուսական գործակալությունը Սիրիայի ղեկավարի հետ զրուցել է Կրեմլում կայացած բանակցություններից անմիջապես հետո։
«Ինչ վերաբերում է Էրդողանի հետ հանդիպմանը, ապա դա կապված է այն փուլին հասնելու հետ, երբ Թուրքիան հստակ ձևով և առանց որևէ անորոշության պատրաստ կլինի Սիրիայի տարածքից զորքերի ամբողջական դուրսբերման, ահաբեկչությանն աջակցության դադարեցման և իրավիճակի վերականգնման, ինչպիսին այն եղել է Սիրիայում պատերազմից առաջ։ Դա միակ տարբերակն է, որի դեպքում կարող է տեղի ունենալ իմ հանդիպումը Էրդողանի հետ։ Բացի այդ՝ ո՞րն է նման հանդիպման արժեքը և ինչո՞ւ այն կազմակերպել, եթե դա չի հանգեցնի Սիրիայում պատերազմի համար վերջնարդյունքի։ Մեզ համար Թուրքիան օկուպանտ պետություն է»,- ասել է Ասադը։
Ըստ նրա՝ Թուրքիան բացասական դերակատարում է ունեցել Սիրիայի պատերազմում՝ աջակցելով կազմակերպություններին, որոնց Դամասկոսը համարում է ահաբեկչական, և զորքեր է մտցրել Սիրիայի տարածք։
Ասադը նշել է նաև Ռուսաստանի կարևոր դերը ինչպես սիրիական, այնպես էլ թուրքական կողմերի հետ լավ հարաբերություններ պահպանելու գործում։
«Մենք վստահում ենք ռուսական կողմին, քանի որ նա միջնորդի դեր է խաղացել այդ շփումները հեշտացնելու համար՝ այն շրջանակում, որի վրա հիմնված է ռուսական քաղաքականությունը: Այդ հիմքերից են՝ հարգանքը միջազգային իրավունքի նկատմամբ, պետությունների ինքնիշխանության ճանաչումը, ահաբեկչության մերժումը, հարգանքը Սիրիայի տարածքային ամբողջականության և սիրիական պետության ինքնիշխանության նկատմամբ, Սիրիայից օտարերկրյա անօրինական զինված ուժերի դուրսբերման անհրաժեշտությունը»,- հավելել է պետության ղեկավարը։
Հավելենք, որ Մոսկվայում առաջիկայում նախատեսվում է սիրիական հարցով քառակողմ քննարկում՝ ՌԴ-ի, Թուրքիայի, Սիրիայի և Իրանի ԱԳ փոխնախարարների մակարդակով։
Էմմա Չոբանյան
