24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
ՌԴ-ն պետք է դիմի ՄԱԿ-ի ԱԽ՝ ԼՂ-ում միջազգային մեխանիզմներ գործարկելու համար․ Փաշինյան
Քաղաքականություն
16.03.2023 | 11:43
Կառավարության նիստի ընթացքում ՀՀ վարչապետ Նիկոլ Փաշինյանը հիշեցրեց, որ ՌԴ Դաշնային խորհուրդը 2020 թվականի նոյեմբերի 18-ին ընդունել է որոշում Լեռնային Ղարաբաղ ՌԴ ԶՈՒ խաղաղապահ զորախումբ գործուղելու մասին:
«Այդ կապակցությամբ Դաշնային խորհրդին ուղղված դիմում-նամակում ՌԴ նախագահ Վլադիմիր Պուտինը Լեռնային Ղարաբաղ խաղաղապահ զորախումբ ուղարկելու մի քանի նպատակ է հիշատակել՝ «Հայկական և ադրբեջանական կողմերից հրադադարի պահպանման և բոլոր ռազմական գործողությունների դադարեցման պայմանավորվածության պահպանման, ԼՂ քաղաքացիական բնակչության զանգվածային զոհերից և քաղաքացիական օբյեկտների էական վնասից խուսափելու համար իմ կողմից որոշում է կայացվել անհապաղ ԼՂ բանակային զորախումբ ուղարկելու մասին»»,- ՌԴ նախագահի՝ Դաշնային խորհրդին ուղղված նամակից հատված մեջբերեց Փաշինյանը:
Դաշնային խորհուրդը, Փաշինյանի խոսքով, նույն ձևակերպումները ներառել է նոյեմբերի 18-ին ընդունված որոշման մեջ:
«Այսպիսով, կարող ենք արձանագրել, որ ՌԴ-ն պաշտոնապես արձանագրել է ԼՂ քաղաքացիական բնակչության զանգվածային սպանության հավանականությունը և ստանձնել է ԼՂ ժողովրդի և քաղաքացիական ենթակառուցվածքների անվտանգության երաշխավորի դերակատարումը:
Հույս ունենք, որ ՌԴ-ն վերը նշված գործառույթը կկատարի լիարժեք: Բայց եթե մեր բարեկամ և դաշնակից ՌԴ-ն որևէ օբյեկտիվ պատճառով չի կարող այդ դերակատարումն իրականացնել, հենց ինքը, կարծում եմ, պետք է դիմի ՄԱԿ-ի ԱԽ՝ ահազանգելով ԼՂ-ում քաղաքացիական բնակչության զանգվածային սպանությունների և քաղաքացիական ենթակառուցվածքների ոչնչացման վտանգի և սա թույլ չտալու համար ԼՂ-ում և Լաչինի միջանցքում լրացուցիչ միջազգային մեխանիզմներ գործարկելու անհրաժեշտության մասին:
Ընդ որում՝ ես որևէ կանխավարկած չունեմ ԼՂ-ում ՌԴ խաղաղապահ զորախմբի գործունեության վերաբերյալ:
Պարզապես վերջին՝ ավելի քան 2 տարում տեղի ունեցած իրադարձությունների շարքը, ինչպես օրինակ՝ Խծաբերդի, Հին Թաղերի օկուպացիան, Փառուխի դեպքերը, Լաչինի միջանցքի ապօրինի շրջափակումը, ոստիկանության աշխատողների և քաղաքացիական անձանց սպանությունները, հրադադարի ռեժիմի պարբերաբար խախտումները, քաղաքացիական բնակչությանը ահաբեկելուն ուղղված գործողությունները անհանգստացնում են»,- ասաց նա:
Միևնույն ժամանակ Փաշինյանը նշեց ՌԴ խաղաղապահ զորախմբի առանձնահատուկ դերը, վաստակը այն բանում, որ ԼՂ-ում դեկտեմբերի 12-ից Լաչինի միջանցքի ապօրինի փակման պատճառով ծայր առած հումանիտար ճգնաժամը հումանիտար աղետի չի վերածվել:
«Ուզում եմ շնորհակալություն հայտնել այդ նպատակին ուղղված ջանքերի համար»,- նշեց վարչապետը։
Մանրամասները՝ տեսանյութում։
