Ցավում եմ, որ ռեկտորի պաշտոնակատարը ներկայացվում է այսքան ոստիկանների ներկայությամբ. Ցոլակ Ակոպյան․ ՏԵՍԱՆՅՈւԹ

ՀՀ կրթության, գիտության, մշակույթի և սպորտի նախարար Ժաննա Անդրեասյանը Վ. Բրյուսովի անվան պետական համալսարանի գիտական խորհրդի անդամներին է ներկայացրել բուհի ռեկտորի պաշտոնակատար, բանասիրական գիտությունների թեկնածու Դավիթ Գյուրջինյանին:

Հիշեցնենք, որ ղեկավարվելով «Հիմնադրամների մասին» օրենքի 23-րդ հոդվածի 7-րդ մասի 3-րդ պարբերության 1-ին, 25-րդ հոդվածի 1-ին մասի 6-րդ կետերով՝ «Վ. Բրյուսովի անվան պետական համալսարան» հիմնադրամի ժամանակավոր խորհրդի որոշմամբ մարտի 15-ին Դավիթ Գյուրջինյանը նշանակվել է ռեկտորի պաշտոնակատար՝ մինչև հիմնադրամի կանոնադրությամբ սահմանված կարգով ռեկտորի ընտրությունն ու հիմնադրի կողմից ռեկտորի ընտրության արդյունքների հաստատումը։

«Ցավում եմ, որ պետական համալսարաններից մեկում ռեկտորի պաշտոնակատարը ներկայացվում է այսքան ոստիկանների ներկայությամբ»,- նշեց պրոռեկտոր Ցոլակ Ակոպյանը։

Նրա խոսքով՝ Կառավարությունը խախտում է նաև բուհի կանոնադրությունում վերջերս կատարած փոփոխությունը, ըստ որի` մինչև նոր ռեկտորի ընտրությունը կամ մրցույթի հաստատումը, ռեկտորի պարտականություններն ամբողջ ծավալով պետք է կատարի ամենաերկար աշխատանքային ստաժ ունեցող պրոռեկտորը։

Նշենք, որ համալսարանականներն ու աշխատակազմն այսօր բողոքի ակցիա են իրականացրել, նրանք դեմ են Գյուրջինյանի նշանակմանը։ Մինչ այդ Գյուրջինյանը որպես իշխանության թեկնածու մասնակցել էր բուհի ռեկտորի ընտրությանը, սակայն պարտվել էր։

Մանրամասները՝ տեսանյութում։