07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
ՌԴ-ն Թեհրանին է փոխանցում Ուկրաինայում առգրավված ամերիկյան արտադրության զենքի նմուշները. CNN
Քաղաքականություն
15.03.2023 | 15:44
Ռուսաստանն Ուկրաինայում առգրավված ամերիկյան զենքերի նմուշները փոխանցում է Իրանին, որտեղ, ինչպես համարում է Վաշինգտոնը, դրանք ենթարկվում են մանրամասն ուսումնասիրության իրանական մասնագետների կողմից։ Այս մասին հայտնում է CNN-ը՝ վկայակոչելով Պենտագոնի իր աղբյուրներին, գրում է BBC-ի ռուսական ծառայությունը։
Մասնավորապես, ամերիկյան իշխանությունները հաստատ գիտեն, որ ամերիկյան Javelin հակատանկային հրթիռային համակարգերի նմուշները հայտնվել են Թեհրանի ձեռքում։ Նման մի քանի համակարգեր Ուկրաինայի զինված ուժերը ստիպված թողել են մարտի դաշտում։
Լրատվամիջոցի աղբյուրները կարծում են, որ Մոսկվայի և Թեհրանի հետ նման պայմանավորվածությունների պարագայում Իրանի իշխանությունները չափազանց շահագրգռված են ռազմական գործողությունների շարունակմամբ և բոլոր հնարավոր ձևերով կաջակցեն Ռուսաստանին պատերազմում։
Դեռևս հայտնի չէ՝ Իրանը կկարողանա՞ հաջողությամբ կրկնօրինակել Ուկրաինայում առգրավված որևէ ամերիկյան զենք, սակայն նախկինում եղել է իրանցիների ձեռքն ընկած ամերիկյան նմուշների հիման վրա զենքի համակարգերի կառուցման հաջող փորձ։
Իրանական գլխավոր մշակումներից մեկը՝ «Թուֆան» հակատանկային կառավարվող հրթիռը, ստեղծվել է 1970-ական թվականներին ամերիկյան BGM-71 TOW հրթիռի հիման վրա։ 2011 թվականին իրանցիները որսացել են նաև ամերիկյան արտադրության Lockheed Martin RQ-170 «Sentinel» անօդաչու թռչող սարքը և պատճենել այն՝ ստեղծելով սեփական անօդաչու թռչող սարքը, որը 2018 թվականին կարողացել է հատել Իսրայելի օդային տարածքը՝ նախքան խոցվելը։
Պենտագոնում նշում են, որ երրորդ երկրներին զենք մատակարարելու վերաբերյալ որոշումներ կայացնելիս նման ռիսկերը հաշվի են առնվում և ավելորդ անհանգստության պատճառներ չկան։
Էմմա Չոբանյան
