Քաղաքականություն
15.03.2023 | 13:45
Թուրքիայի հարավում տեղացած հորդառատ անձրևները խորացրել են փետրվարի 6-ի ավերիչ երկրաշարժերից փրկվածների թշվառությունը, որոնք ապրում են վրանային ճամբարներում, գրում է Turkish Minute-ը։
Նշվում է, որ երկրաշարժից փրկվածներն աղետից մեկ ամիս անց դեռևս խնդիրների են բախվում, հիմա էլ հորդառատ անձրևներից առաջացած հեղեղի հետևանքով ստիպված են եղել լքել իրենց վրանները հարավային Հաթայ և Քահրամանմարաշ նահանգներում։
Համացանցում տարբեր տեսանյութեր ու լուսանկարներ են տարածվում, թե ինչպես են «մարդիկ պայքարում հեղեղի դեմ՝ հետևանքները վերացնելով», և թե ինչ իրավիճակ է ստեղծվել վրանային ճամբարներում հեղեղի հետևանքով։
Թուրքիայի ներքին գործերի նախարար Սուլեյման Սոյլուի խոսքով՝ երկրաշարժից հետո 354 վայրերում տեղադրվել է 433,536 վրան։ Նա նաև նշել է, որ նախատեսվում է 115,585 կոնտեյներային տներ տեղադրել տուժածների համար։
Հավելենք, որ երկրաշարժի հետևանքով Թուրքիայում զոհերի թիվը գերազանցել է 48,000-ը։
Էմմա Չոբանյան
