17.12.2025 | 19:14
Աստղաձորի տներից մեկում հրդեհ է բռնկվել
Ուկրաինան դոսյեներ է կազմել 600 ռուս ռազմական հրամանատարների, այդ թվում՝ Պուտինի վերաբերյալ․ The Guardian
Քաղաքականություն
14.03.2023 | 15:51
Ուկրաինացի դատախազները հարյուրավոր դոսյեներ են կազմել 600 ռուս ռազմական հրամանատարների հետ կապված, որոնց կասկածում են Ուկրաինայի տարածքում ռազմական հանցագործությունների մեջ, գրում է The Guardian-ը։
Դատախազները Guardian-ին են ներկայացրել իրենց կազմած աղյուսակը՝ 4 մետր երկարությամբ և 1,5 մետր լայնությամբ: Այն պարունակում է կասկածյալների անուններն ու լուսանկարները, որոնց նկատմամբ քրեական գործեր են հարուցվել Ուկրաինայում՝ ՌԴ պաշտպանության նախարար Սերգեյ Շոյգուից և նախագահ Վլադիմիր Պուտինից մինչև գնդապետներ և այլ զինվորական բարձրաստիճան պաշտոնյաներ։
«Մենք սկսել ենք դոսյեներ հավաքել ռուս հրամանատարների ու գեներալների դեմ անցյալ տարվանից»,- լրատվամիջոցին ասել է Խարկովի շրջանի գլխավոր դատախազ Ալեքսանդր Ֆիլչակովը։
Կասկածյալների թվում է գեներալ-գնդապետ Միխայիլ Միզինցևը, որը գլխավորել է Մարիուպոլի եռամսյա պաշարումը, որտեղ, ուկրաինական իշխանությունների գնահատմամբ, զոհվել է 22 հազար մարդ։ Բացի այդ, Միզինցևը ղեկավարել է Սիրիայում արշավանքները և, ըստ ռազմական փորձագետների, նա մասամբ օգտագործել է այդ փորձը Մարիուպոլում։ 2022 թվականի մարտին բրիտանական կառավարությունն անհատական պատժամիջոցներ էր սահմանել Միզինցևի դեմ։
Եվս մեկ սպա է 64-րդ առանձին մոտոհրաձգային բրիգադի հրամանատար Ազատբեկ Օմուրբեկովը։ Այս բրիգադը գործել է Բուչայում, իսկ դրանում ներառված զինվորականները մեղադրվում են քաղաքացիական անձանց սպանության, բռնաբարության և խոշտանգումների մեջ։
Ուկրաինայի ԱԳ նախարար Դմիտրի Կուլեբան իր հերթին այսօր հայտարարել է, որ Ուկրաինայի դեմ հանցագործությունների և ագրեսիայի գործով հատուկ տրիբունալի ստեղծման կոալիցիային միացել է ևս երկու երկիր։ Կուլեբան չի հստակեցրել, թե որ երկրների մասին է խոսքը։
«32 պետություններ այժմ միասին աշխատում են Ռուսաստանի բարձրագույն քաղաքական և ռազմական ղեկավարությանը պատասխանատվության ենթարկելու համար: Պուտինը և նրա գործընկերները կկանգնեն դատարանի առաջ»,- գրել է Կուլեբան թվիթերյան իր էջում։
Էմմա Չոբանյան
