Ջերմուկը կդառնա ուրվական քաղաք․ Ամուլսարի պայմանագրով դառնում է էլ ավելի խոցելի․ Ինգա Զարաֆյան

«Կառավարությունը ստորագրել է անորոշ, ոչինչ չասող փաստաթուղթ․ այս փաստաթղթում շատ հակասություններ կան»,- այս մասին «Ամուլսարի հանքը շահագործելու նոր փորձ. հաշվարկվա՞ծ են բնապահպանական, անվտանգային ռիսկերը» թեմայով քննարկման ժամանակ հայտարարեց «ԷկոԼուր» տեղեկատվական ՀԿ-ի նախագահ Ինգա Զարաֆյանը՝ հավելելով, որ որ Ամուլսարի ծրագրի վերսկսման վերաբերյալ պայմանագրի ստորագրմամբ՝ կառավարությունը շատ մեծ պատասխանատվություն է ստանձնում և շատ մեծ ռիսկեր է վերցնում։

«Քանի որ սա դեռևս լիարժեք պայմանագիր չէ, իմ կարծիքով՝ շահագրգիռ երեք կողմերը փորձում են սրանով ստուգել հանրության արձագանքը, դիմադրությունը և ռեալ քայլերի անցնելու ռիսկերը»,- նշեց փորձագետը։

Հիշեցնենք, որ փետրվարի 22-ին էկոնոմիկայի նախարար Վահան Քերոբյանը հայտարարեց, որ Ամուլսարի ոսկու հանքը կշահագործվի, ՀՀ կառավարությունը 250 միլիոն դոլար արժողությամբ համաձայնագիր է ստորագրել «Լիդիան Արմենիա» ընկերության և Եվրասիական զարգացման բանկի հետ։ Նշվեց, որ հանքի շահագործման դիմաց Հայաստանը ստանալու է «Լիդիան Արմենիա» ընկերության բաժնետոմսերի 12,5 տոկոսը։

Զարաֆյանի դիտարկմամբ՝ կառավարության ներկայացրած հիմնավորումներում ընդգծվում է անվտանգության հարցը, սակայն չեն իրականացվել անվտանգությանը միտված ծրագրեր, և հանքի շահագործամն այս ծրագրով էլ Ջերմուկը դառնում է շատ ավելի խոցելի։

Զարաֆյանի խոսքով՝ նշվում է, որ ՇՄԱԳ-ով նախատեսված է 800 աշխատատեղ բացել․ «Դա նշանակում է, որ Ջերմուկ կգան տարբեր ռեգիոններից աշխատակիցներ և կփոխարինեն տեղի բնակչությանը, քանի որ տեղի բնակչությունը մասնագիտացված է առողջապահական ծառայությունների ոլորտում, և երբ հանքը շահագործվի, տեղաբնակները դուրս կգան»։

«ԷկոԼուր»-ի նախագահի դիտարկմամբ՝ Ամուլսարի հանքի շահագործման պարագայում Ջերմուկն այլևս չի լինի առողջարանային քաղաք, այն որպես հանգստավայր գոյություն չի ունենա, այլ կդառնա ուրվական քաղաք։

Մանրամասները՝ տեսանյութում։