17.05.2026 | 14:43
Ժաննա Անդրեասյանն այցելել է Բաղաբերդի ամրոց
Իսրայելում ցուցարարներն արգելափակել են օդանավակայանի մուտքը՝ երկրից Նեթանյահուի մեկնելուց առաջ
Քաղաքականություն
09.03.2023 | 19:24
Թել Ավիվում ցուցարարները կառավարական համալիրի մոտ փակել են մայրուղին, ինչպես նաև «Բեն Գուրիոն» օդանավակայանի մուտքը, որտեղից Իսրայելի վարչապետ Բենիամին Նեթանյահուն պետք է մեկնի Իտալիա, հայտնում է News.ru-ն։
Իսրայելցիները բողոքում են դատական համակարգի բարեփոխումների դեմ։ Բողոքի ակցիան սկսվել է Թել Ավիվի կենտրոնական Հաբիմա հրապարակում։ Այնտեղից ցուցարարները շարժվել են դեպի կառավարական համալիր։ Ցուցարարներին կանգնեցնելու համար այնտեղ են տեղակայվել ոստիկանության հեծյալ ստորաբաժանումները։ Նմանատիպ ակցիաներ են տեղի ունենում նաև հանրապետության այլ քաղաքներում։
Որոշ ժամանակ առաջ Նեթանյահուի կառավարությունը հրապարակել էր դատաիրավական բարեփոխումների նախագիծը։ Այն ենթադրում է Իսրայելի Գերագույն դատարանի լիազորությունների էական սահմանափակում, մասնավորապես, խորհրդարանի կողմից ընդունված օրենքները չեղարկելու իրավասություն։ Բացի այդ, այն հնարավորություն է տալիս կառավարությանը վերահսկել դատավորների նշանակումը։
Մարտի 1-ին նախատեսված էր Իսրայելի խորհրդարանում քվեարկություն դատական բարեփոխումների նախագծի վերաբերյալ։ Սակայն ընդդիմադիր պատգամավորները բոյկոտել են այն և ցուցարարների հետ միասին դուրս եկել փողոց։
Նեթանյահուն հայտարարել է, որ ընդդիմության առաջնորդ Յաիր Լապիդը ձգտում է երկրում անարխիա հրահրել։ Վերջինը ևս նմանատիպ մեղադրանք է հնչեցրել վարչապետի հասցեին։
Տաթև Ֆռանգյան
