14.12.2025 | 20:34
Դեկտեմբերի 15-ին Արարատ Միրզոյանն աշխատանքային այցով գտնվելու է Բրյուսելում
Թուրքիան դադարեցրել է պատժամիջոցների տակ գտնվող ապրանքների տարանցումը դեպի Ռուսաստան
Քաղաքականություն
09.03.2023 | 18:26
Թուրքիայի մաքսային մարմինները սկսել են արգելափակել պատժամիջոցների տակ գտնվող ապրանքների՝ Ռուսաստանի Դաշնություն տարանցման մաքսազերծումը։ Այս մասին հայտնում է «Կոմերսանտը»։
Նշվում է, որ խոսքը զուգահեռ ներմուծման միջոցով Ռուսաստան գնացող ապրանքների մասին է։ Վաճառողների համար այս քայլն անսպասելի էր, և նրանք շտապ այլ տարբերակներ են փնտրում պատժամիջոցների տակ գտնվող ապրանքների տարանցման համար։
«Օպտիմալոգ» ընկերության գործադիր տնօրեն Գեորգի Վլաստոպուլոն հաստատել է, որ թուրքական մաքսային համակարգն արգելափակում է ոչ թուրքական ծագում ունեցող ապրանքների տարանցիկ մաքսազերծումը։
Transasia Logistics-ի կոմերցիոն տնօրեն Վալերիա Սավենկովան էլ նշել է, որ տարանցման դադարեցման մասին տեղեկատվության պաշտոնական հաստատում պետք չէ սպասել։ Այդ դեպքում Թուրքիան պետք է խոստովանի, որ մասնակից է եղել Ռուսաստանին պատժամիջոցների տակ գտնվող ապրանքների մատակարարմանը։
Մարտի 3-ին Bloomberg-ը գրել էր, որ ԱՄՆ-ը սպառնացել է իր ընկերություններին, որոնք ապրանքներ են առաքում Չինաստան, Թուրքիա և Ուզբեկստան, հակառուսական պատժամիջոցները շրջանցելու հետևանքների մասին։ ԱՄՆ-ը նախազգուշացրել է ձեռնարկություններին զգոն լինել գործարքների հարցում, որոնք կարող են օգնել Ռուսաստանին խուսափել արևմտյան պատժամիջոցներից, հատկապես, եթե դրանք կապված են Չինաստանի, Թուրքիայի և մի քանի այլ երկրների հետ:
Մարտի 4-ին Bloomberg-ը, վկայակոչելով եվրոպացի բարձրաստիճան դիվանագետին, հայտնել էր, որ ռուսական ներմուծման ծավալը վերադարձել է 2020 թվականի մակարդակին։
Տաթև Ֆռանգյան
