06.06.2026 | 22:18
Երկրաշարժ Սպիտակ քաղաքից 11 կմ հարավ-արևելք
Վրաստանի նախագահն իր աջակցությունն է հայտնել «օտարերկրյա գործակալների մասին» օրենքի դեմ բողոքող ցուցարարներին
Քաղաքականություն
08.03.2023 | 00:42
Վրաստանի նախագահ Սալոմե Զուրաբիշվիլին հայտարարել է, որ նրանք, ովքեր այսօր Ռուսթավելիի պողոտայում կանգնած են «օտարերկրյա գործակալների» մասին օրենքի դեմ, ներկայացնում են ազատ Վրաստանը։
Վրաստանի նախագահը այս օրերին պաշտոնական այցով գտնվում է Նյու Յորքում։
«Ես դիմում եմ նրանց, ովքեր այս գիշեր կանգնած են Ռուսթավելիի փողոցում, ինչպես կանգնած են եղել բազմիցս։ Ես կանգնած եմ այստեղ՝ Նյու Յորքում, իսկ իմ հետևում Ազատության արձանն է: Ազատությունը խորհրդանիշ է, որի համար Վրաստանը միշտ պայքարել է… Ես ձեր կողքին եմ։ Այսօր դուք ներկայացնում եք ազատ Վրաստանը։
Վրաստանը, որն իր ապագան տեսնում է Եվրոպայում, ոչ մեկին թույլ չի տա խլել այդ ապագան»,-հայտարարել է Զուրաբիշվիլին։
Նա նշել է, որ վետո կդնի այդ օրենքի վրա։
«Առաջին օրվանից ասել եմ, որ վետո է լինելու։ Եվ վետո կլինի»,-ասել է նախագահը։
Հիշեցնենք՝ Վրաստանի խորհրդարանը մարտի 7-ի լիագումար նիստում առաջին ընթերցմամբ ընդունել է «օտարերկրյա գործակալների մասին» օրենքը։ Արդյունքում երկրում սկսվել են զանգվածային բողոքի ցույցեր։ Ցուցարարների ու ոստիկանների միջև բախումներ են գրանցվել։
