20.04.2026 | 11:56
Երկու շաբաթվա ընթացքում 8 նոր ավտոբուսի գումար ենք հավաքագրել. Տիգրան Ավինյան․ ՏԵՍԱՆՅՈՒԹ
Թուրքական Կարմիր մահիկը երկրաշարժից տուժածներին վրաններ է վաճառել՝ հանգեցնելով բողոքի ցույցի
Քաղաքականություն
27.02.2023 | 16:06
Թուրքիայում փետրվարի 6-ի ավերիչ երկրաշարժից հետո ընդդիմադիր լրատվամիջոցների կողմից բացահայտումները բուռն քննարկումներ ու քննադատություններ են առաջացրել։ Մասնավորապես, Թուրքիայի ընդդիմությունն ու լրատվամիջոցները քննադատում են Կարմիր մահիկի թուրքական գրասենյակին՝ երկրաշարժի հետևանքով անօթևան մնացածներին վրաններ վաճառելու, ոչ թե նվիրաբերելու համար։
Թուրքական Կարմիր մահիկի նախագահ Քերեմ Քինիկը խոստովանել է, որ իրենք 2050 վրան են վաճառել «Ահբափ» ասոցիացիային՝ վրաններն անմիջապես աղետի գոտի հասցնելու և փրկվածներին կացարան տրամադրելու փոխարեն: Թուրքական դեղագործների միությունը ևս հայտնել է, որ Կարմիր մահիկն իրենց վրաններ է վաճառել երկրաշարժից մի քանի օր անց։
Քինիկն ավելի վաղ հայտարարել էր, որ իրենք դեռևս 100,000 վրանների պակաս ունեն, իսկ երկրաշարժի գոտում մոտ մեկ միլիոն մարդ փորձում է գոյատևել սեփական միջոցներով։
Այս ամենը սկանդալ է առաջացրել երկրում։ Թուրքիայի Աշխատավորական կուսակցության անդամները նախօրեին Ստամբուլում բողոքի ցույց են կազմակերպել թուրքական Կարմիր մահիկի դեմ, որին մեղադրում են նույնիսկ աղետի պայմաններում առևտրային շահեր հետապնդելու համար, գրում է Gercek News-ը։
Կուսակցության Ստամբուլի գրասենյակները շրջափակվել են ոստիկանության կողմից, մի քանի անդամներ, այդ թվում՝ կուսակցության Ստամբուլի մասնաճյուղի նախագահ Ջենգիզ Յեթերը, ձերբակալվել են:
«Երկրաշարժից զոհվել է 50 հազար մարդ, հազարավոր մարդիկ դեռ փլատակների տակ են, իսկ ներքին գործերի նախարար Սուլեյման Սոյլուն զբաղված է մեզ պաշարելով»,- Twitter-ում գրել է կուսակցության պատգամավոր Բարըշ Աթայը։
«Polis» հեշթեգը Twitter-ում թրենդային է դարձել, քանի որ հազարավոր մարդիկ հաղորդագրություններ են հրապարակել՝ ի նշան ոստիկանության վերաբերմունքի դեմ բողոքի։
Էմմա Չոբանյան
