Բանակից մի լուցկու հատիկ գողացողը տեղ չունի մեր հասարակության մեջ․ երիտասարդները պահանջում են զրկել Մանվել Գրիգորյանին Արցախի հերոսի կոչումից

Մի խումբ երիտասարդներ պահանջում են Մանվել Գրիգորյանին զրկել Արցախի հերոսի բարձրագույն կոչումից։

Մի խումբ երիտասարդներ այս պահանջով ակցիա էին իրականացնում ՀՀ-ում Արցախի ներկայացուցչության շենքի դիմաց։ Երիտասարդներն իրենց պահանջը հայտնեցին ՀՀ-ում Արցախի մշտական ներկայացուցիչ Կառլեն Ավետիսյանին։ Նրանք ներկայացուցչին փոխանցեցին նամակ, որում շարադրված է իրենց պահանջը։ 

«Ես զոհված ազատամարտիկ Լևոն Հախվալյանի որդին եմ։ Վերջին օրերին Մանվել Գրիգորյանի հետ կապվածը ամբողջ հայության շրջանում առաջացրեց հոգեկան ընդվզում, քանի որ Մանվելը համարվում է Արցախի հերոս և մեզ համար, այն մարդկանց համար, ովքեր Արցախյան պատերազմի հետ կապ ունեն, շոկ էր, որ մի մարդ կարող է յուրացնել բանակի համար հատկացված տեխնիկան և սնունդը»,- ասաց  երիտասարդը՝ շեշտելով, որ քանի որ Արցախի հերոսի կոչումը նրան շնորհել է Արցախի իշխանությունը, դրա համար էլ այդ կոչումից նրան կարող է զրկել միայն ու միայն Արցախի իշխանությունը։

Կառլեն Ավետիսյանը շնորհակալություն հայտնեց երիտասարդներին իրենց ակտիվության համար, ընդգծեց, որ վստահ է, որ նրանց այս քայլի հետևում հազարավոր մարդիկ են կանգնած և շեշտեց․ «Առաջին հարցը Ստեփանակերտից սա է՝ ոնց կարող էր էդպիսի բան տեղի ունենալ։ Համոզված եմ, որ ամեն ինչ կստանա իր գնահատականը, բայց ամենավատն այն է, որ մեզանից վերցրել են մեր հավատն ու վստահությունը, բայց բոլոր հարցերը իրենց լուծումները կստանան»,- ասաց նա՝ շեշտելով, բանակից մի լուցկու հատիկ գողացողը տեղ չունի մեր հասարակության մեջ և նա պետք է դավաճան կոչվի։