Պատժողական քաղաքականությանը փոխարինելու է եկել վերասոցիալականացումը. ցմահ դատապարտյալ Մհեր Ենոքյան․ ՏԵՍԱՆՅՈՒԹ

Ազատազրկված անձանց կրթության իրավունքն ամրագրված է քրեակատարողական ոլորտը կանոնակարգող օրենսդրությամբ: Կրթությունը նաև ազատազրկված անձանց վերասոցիալականացման կարևոր բաղադրիչներից է: Մինչդեռ ազատազրկված անձանց կրթության իրավունքն արդյունավետ ձևով չի իրացվում, ինչը կապված է օրենսդրական, պրակտիկ և մի շարք այլ խնդիրների հետ: Դա ոչ միայն հանգեցնում է ազատազրկված անձանց կրթության իրավունքի խախտմանը, այլև խաթարում է նրանց վերասոցիալականացման գործընթացը՝ մեծացնելով կրկնահանցագործություն կատարելու ռիսկերը:

«Իրավական նախաձեռնությունների կենտրոն» ՀԿ-ն այսօր կազմակերպել է «Կրթությունը քրեակատարողական հիմնարկներում. մարտահրավերներ և հեռանկարներ» թեմայով կոնֆերանս, որին մասնակցում էր նաև ցմահ դատապարտյալ Մհեր Ենոքյանը։

Միայն այն փաստը, որ ցմահ ազատազրկված անձը մասնակցում է կոնֆերանսին, Ենոքյանի դիտարկմամբ, արդեն ոլորտում տեղաշարժի մասին է վկայում:

«Պատժողական քաղաքականությանը փոխարինելու է եկել վերասոցիալականացումը»,- ընդգծեց Ենոքյանը։

Ենոքյանը նշեց, որ բարձրագույն կրթություն ստացողների ճնշող մեծամասնությունը ցմահ դատապարտյալներն են: Նա կարևորեց նաև ընտանիքների աջակցությունը: Ենոքյանի խոսքով՝ նրանք են կրթական նյութերը համալսարանից ՔԿՀ տանում-բերում: Դատապարտյալը կոչ արեց «փոստատարի» դերը ընտանիքներին չվերապահել, քանի որ ոմանք ընտանիք չունեն, հետևաբար նյութերը տանող-բերող չունեն և չեն կարողանա ստանալ բարձրագույն կրթություն:

Մանրամասները՝ տեսանյութում։