06.06.2026 | 22:18
Երկրաշարժ Սպիտակ քաղաքից 11 կմ հարավ-արևելք
Շուրջ 4 մլն դրամ՝ Փարիզ մեկնելու համար․ ԱԺ աշխատակիցների քառօրյա այցի ծախսերը
Քաղաքականություն
09.02.2023 | 20:53
Ազգային ժողովի աշխատակազմի ներկայացուցիչների Ֆրանսիա կատարած աշխատանքային քառօրյա այցը պետական բյուջեի վրա արժեցել է 3 մլն 907 հազար դրամ։ Այս մասին Factor.am-ը տեղեկանում է Ազգային ժողովի աշխատակազմից ստացված հարցումից։ Այս գումարը ներառում է ճանապարհածախսը, գիշերակացը և օրապահիկը։
Factor.am-ն ավելի վաղ տեղեկացրել էր, որ հունվարի 28-ից փետրվարի 2-ը Ալեն Սիմոնյանի կարգադրությամբ՝ ԱԺ աշխատակազմի ղեկավար Վահան Նարիբեկյանը, աշխատակազմի ղեկավարի տեղակալ Հեղինե Խաչիկյանը, ԱԺ աշխատակազմի հասարակայնության հետ կապերի վարչության պետ Լաուրա Անտոնյանը և ԱԺ նախագահի օգնական Աշխեն Հայրապետյանն աշխատանքային այցով մեկնել են Փարիզ։ ԱԺ նախագահի կարգադրությունում չէր հստակեցվում, թե աշխատանքային ինչ հանդիպումների մասին է խոսքը։
Factor.am-ին Ազգային ժողովից տեղեկացրել են, որ հանդիպումներ են ունեցել Ֆրանսիայի սենատի աշխատակազմի ներկայացուցիչների հետ։
Աշխատանքային այցի մասին ԱԺ պաշտոնական կայքում ծավալուն հաղորդագրություն է հրապարակվել՝ ընդգծվում է հանդիպումների շրջանակը, բայց որևէ լուսանկար չի տեղադրվել։ Ուշագրավ է նաև այն հանգամանքը, որ այցը նախատեսված էր մինչև փետրվարի 4-ը, սակայն, ԱԺ նախագահի կարգադրության մեջ փոփոխություն էր կատարվել և պատվիրակությունը վերադարձել էր փետրվարի 2-ին։ Վերադարձի հաջորդ օրը հայտնի դարձավ, որ Ալեն Սիմոնյանն աշխատանքից ազատել է Վահան Նարիբեկյանին։
Նարեկ Կիրակոսյան
