30.11.2024 | 01:27
ՀՀ-ն հետ է կանչել Սիրիայում հումանիտար ականազերծման և բուժաշխատողների մասնագիտական խմբի ողջ անձնակազմին
Թուրքիայի հայ համայնքը 2,5 մլն լիրա է նվիրաբերել երկրաշարժից տուժածներին օգնության համար
Քաղաքականություն
09.02.2023 | 13:16
Թուրքիայի Հայկական հիմնադրամների միության նախագահ, Սուրբ Փրկիչ հիվանդանոցի խորհրդի նախագահ Պետրոս Շիրինօղլուն հայտնել է երկրաշարժից տուժածների համար արված նվիրատվության մասին և նշել, որ Թուրքիայի աղետների և արտակարգ իրավիճակների վարչության՝ AFAD-ի հաշվին 2,5 միլիոն լիրա նվիրատվություն է փոխանցվել, գրում է Birgün-ը։
Շիրինօղլուն նշել է, որ երկրաշարժը մեծ աղետ է։
«Հաշվի առնելով երկրաշարժի ծանրությունը, ազդեցությունը և պատճառած ավերածությունները՝ սա աղետ է, որը հազվադեպ է լինում պատմության մեջ: Մենք ցնցված ենք խորը ցավից, խոսքերը բավարար չեն: Ես աղոթում եմ մեր բոլոր եղբայրների և քույրերի համար, որոնք պայքարում են փլատակների տակ գոյատևելու համար, նաև փլատակների գլխին սպասում են բարի լուրերի իրենց հարազատներից։ Վիրավորներին մաղթում եմ ապաքինում, զոհվածներին՝ ողորմություն, իսկ մնացածներին՝ համբերություն։ Մենք, որպես երկիր, շատ դժվար ժամանակներ ենք ապրում։ Բայց մենք մեծ պետություն ենք, այս աղետը հաղթահարելու ենք համառությամբ, երիտասարդությամբ և համախմբվածությամբ։ Մենք միասին կբուժենք մեր վերքերը։ Մենք աջակցելու ենք մեր պետության կողմից նախագահի համակարգմամբ իրականացվող որոնողափրկարարական աշխատանքներին և համերաշխ ենք լինելու երկրաշարժից տուժած մեր եղբայրների հետ»,- ասել է Շիրինօղլուն։
Հավելենք, որ ավելի վաղ էլ Պոլսո Հայոց պատրիարքարանում պատրիարք Սահակ Մաշալյանի գլխավորությամբ տեղի էր ունեցել խորհրդակցություն երկրաշարժից տուժածներին օգնության տրամադրման հարցով։
Էմմա Չոբանյան
