15.12.2025 | 21:13
Ալիևը համաներում է նախաձեռնում. այն կվերաբերի ավելի քան 20,000 մարդու
ՌԴ-ն վրեժով լցված՝ Ալիևին գուցե դրդի հարվածել մեզ, որ ԵՄ-ին ապալեգիտիմացնի․ Մհեր Հակոբյան
Քաղաքականություն
03.02.2023 | 19:15
ՌԴ ԱԳ նախարար Սերգեյ Լավրովը ՀՀ-ին «օկուպանտ» անվանելիս չգիտե՞ր արդյոք, որ 1993-ին ՄԱԿ ԱԽ-ի ընդունած չորս բանաձևերից 822-րդով կոչ էր արվում «հրադադարի հաստատում և տեղական հայկական ուժերի դուրսբերում Քելբաջարի շրջանից»։ Ուշադրություն՝ «ո՛չ թե ՀՀ-ի զորքերի դուրսբերում» են պահանջել, այլ՝ «տեղական հայկական ուժերի», այսինքն՝ ԼՂ-ի պաշտպանական ուժերի։ Այս բանաձևի տակ ստորագրել է նաև ՌԴ-ն։ Ինչո՞ւ է Լավրովը ՀՀ-ին դարձնում պատերազմի կողմ՝ կեղծելով իրականությունը։ Ռազմաքաղաքական հարցերով վերլուծաբան Մհեր Հակոբյանը Factor TV-ի հետ հարցազրույցում ասում է՝ ՀՀ-ի հասցեին «օկուպանտ» բառի կիրառումը սխալ է և չունի որևէ հիմք․ «Այն, որ միջազգային որևէ փաստաթղթով հայկական կողմը, և մասնավորապես՝ ՀՀ-ն չի համարվել օկուպանտ, դա փաստ է։ Ավելին ասեմ՝ ԵԱՀԿ Մինսկի խումբը 1994-95 թվականներից սկսեց ակտիվ գործել, և նրա որևէ բանաձևում, խոսույթում, բանակցային ոչ մի փաստաթղթում նման հասկացություն չի եղել, որ ՀՀ-ն «օկուպանտ» է։ ԵԱՀԿ Մինսկի խումբը երբ ստեղծվեց, հիմքում ուներ ՄԱԿ-ի ԱԽ-ի չորս բանաձևերը, որոնք Ալիևը շատ է սիրում հիշատակել, բայց այդ բանաձևերում այնպես չէ, որ հակահայկական բնույթ կար։ Ընդամենը՝ Ալիևն է անբարեխիղճ մեկնաբանություն տալիս այդ բանաձևերին։ Եվ հետո՝ այդ բանաձևերն օղակվեցին Մինսկի խմբում, և բանաձևերը մնացին անցյալում։ Եթե Մինսկի խմբի համանախագահները համարում էին, որ ՀՀ-ն «օկուպանտ» է, ինչո՞ւ բանակցությունների ժամանակ որևէ կերպ չէին շեշտադրում դա։ Իրավաբանական տեսանկյունից՝ ՀՀ-ն երբեք չի պատերազմել Ադրբեջանի դեմ»,- ասաց ռազմաքաղաքական հարցերով վերլուծաբանը։
Հարցազրույցն ամբողջությամբ՝ տեսանյութում։
Ռոբերտ Անանյան
