16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Բրազիլիայի նախագահն առաջարկել է Ուկրաինայում խաղաղության հասնելու համար նոր ձևաչափ ստեղծել
Քաղաքականություն
31.01.2023 | 14:20
Բրազիլիայի նախագահ Լուիս Ինասիու Լուլա դա Սիլվան հայտարարել է, որ իր երկիրը Գերմանիայի կողմից փոխանցված Gepard համալիրների արկեր Ուկրաինա չի մատակարարելու։ Գերմանիայի կանցլեր Օլաֆ Շոլցը, որը պաշտոնական այցով այդ երկրում է, մատակարարումների մասին խնդրել էր Բրազիլիայի ղեկավարությանը, գրում է DW-ի ռուսական ծառայությունը։ Շոլցի հետ համատեղ մամուլի ասուլիսում դա Սիլվան նաև խուսափել է Ուկրաինայի դեմ Ռուսաստանի ագրեսիայի ուղղակի դատապարտումից։ Բրազիլիայի ղեկավարը միայն կարծիք է հայտնել, որ Մոսկվան «դասական սխալ է թույլ տվել»՝ հարձակվելով մեկ այլ երկրի տարածքի վրա։ Նա նշել է, որ հակամարտության իրական պատճառներն իրեն այնքան էլ ակնհայտ չեն թվում։ Դա Սիլվան միաժամանակ առաջարկել է իր միջնորդությունը ՌԴ-ի ու Ուկրաինայի միջև խաղաղության բանակցություններում՝ նշելով, որ կարգավորման համար անհրաժեշտ է նոր բազմակողմանի ձևաչափ։Բրազիլիայի նախագահը հավելել է, որ կշարունակի աշխատել այլ երկրների հետ՝ Ուկրաինայում խաղաղության հասնելու համար։ Նա, մասնավորապես, մտադիր է այս թեման քննարկել մարտին նախատեսված Պեկին այցի ընթացքում։
Բրազիլիա կատարած այցից առաջ Շոլցը այցելել է նաև Արգենտինա ու Չիլի։ Այս երկու երկրների նախագահները ևս խուսափել են հստակ նշել՝ արդյո՞ք կմեծացնեն Ուկրաինային աջակցությունը, այդ թվում՝ զենքի մատակարարումներով, սակայն նրանք ավելի բացահայտ են դատապարտել ռուսական ագրեսիան։
Էմմա Չոբանյան
