Թուրքիան հետաքննություն է սկսել փաստաբանների միությունների նախագահների նկատմամբ Անկարայի ռազմական գործողությունների դեմ հայտարարությունների համար

Թուրքական դատախազությունը հետաքննություն է սկսել երկրի 12 փաստաբանների միությունների նախագահների նկատմամբ՝ Թուրքիա պետությունը վիրավորելու համար։ Պատճառաը Սիրիայում ու Իրաքում երկրի ռազմական գործողությունների դեմ նրանց համատեղ հայտարարություններն են, գրում է Turkish Minute-ը։

Հետաքննությունը սկսվել է Թուրքիայի քրեական օրենսգրքի վիճահարույց 301-րդ հոդվածով (վերաբերում է թուրք ազգին, պետությանը, հանրապետությանը և պետական մարմիններին վիրավորելուն)՝ փաստաբանների միությունների նախագահների նկատմամբ, այդ թվում՝ հարավարևելյան նահանգների՝ Դիարբեքիր, Վան ու Մարդին։

Փաստաբանների 12 միությունների նախագահները համատեղ հայտարարություն էին արել անցյալ տարվա նոյեմբերին՝ Սիրիայի և Իրաքի հյուսիսում Թուրքիայի զինված ուժերի ավիահարվածների դեմ քուրդ զինյալների դեմ։ Հայտարարության մեջ նրանք կոչ էին արել դադարեցնել Թուրքիայի ռազմական գործողությունները Սիրիայում և Իրաքում՝ ասելով, որ իրենք պետք է պաշտպանեն խաղաղությունը բոլոր հանգամանքներում։

Դիարբեքիրի փաստաբանների ասոցիացիայի նախագահ Նահիթ Էրենն ասել է, որ իրենց հայտարարության մեջ հանցագործության տարր չկա, և որ հետաքննությունը նպատակ ունի վախեցնել ու լռեցնել իրենց։

Դիարբեքիրի գլխավոր դատախազության կողմից գործն ուղարկվել է Արդարադատության նախարարություն, քանի որ դատախազները պետք է թույլտվություն ստանան նախարարությունից՝ 301-րդ հոդվածի համաձայն:

Նշենք, որ Անկարան ավիահարվածներ էր սկսել Ւրաքում ու Սիրիայում անցյալ տարվա նոյեմբերին 13-ին Ստամբուլում պայթյունից հետո, որի հետևանքով 6 մարդ էր զոհվել։

Անկարան Ստամբուլի հարձակման համար մեղադրում է Քուրդիստանի աշխատավորական կուսակցությանը (PKK), որը Թուրքիայի և միջազգային հանրության մի մասի կողմից ճանաչվել է որպես ահաբեկչական խմբավորում:

Էմմա Չոբանյան