15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
ՄԱԿ-ի հիմնադրամի Բաքվի գրասենյակի ղեկավարը կանչվել է Ալիևի աշխատակազմ՝ Լաչինի միջանցքի փակման վերաբերյալ հայտարարության պատճառով
Քաղաքականություն
25.01.2023 | 17:34
ՄԱԿ-ի Բնակչության հիմնադրամի ադրբեջանական գրասենյակի ղեկավարին այսօր կանչել են Ադրբեջանի նախագահ Իլհամ Ալիևի աշխատակազմ և մտահոգություն հայտնել հունվարի 24-ին Լաչինի միջանցքի փակման վերաբերյալ արված հայտարարության կապակցությամբ։
Տեղական լրատվականները հայտնում են, որ հանդիպմանն ադրբեջանական կողմը նշել է, թե, իբր, «իր տարածքների օկուպացիայի ժամանակ» ՄԱԿ-ի տարբեր կառույցներ, ի պատասխան Ադրբեջանի դիմումներին, նշել են, որ «հումանիտար կազմակերպություններ են և չեն խառնվում քաղաքական հարցերին»։
Նշվում է, որ ըստ որոշ տեղեկությունների՝ Հայաստանն ակտիվացրել է ջանքերը Արցախ ՄԱԿ-ի առաքելություն ուղարկելու, ինչպես նաև ՄԱԿ-ի տարբեր կազմակերպությունների կողմից մարդասիրական օգնություն տրամադրելու ուղղությամբ։
Ըստ Ադրբեջանի՝ ՄԱԿ-ի որոշ կազմակերպություններ անգամ բանակցում են այս ուղղությամբ՝ «առանց ադրբեջանական կողմի հետ խորհրդակցությունների»։ Այս կապակցությամբ Ադրբեջանում ՄԱԿ-ի Բնակչության հիմնադրամի գրասենյակի ղեկավարի ուշադրությանն է ներկայացվել, որ, իբր, «Հայաստանն ու նրա հովանավորները փորձում են ՄԱԿ-ը դարձնել քաղաքական գործիք Բաքվի դեմ իրենց կեղտոտ զրպարտչական արշավում»։
Բաքուն նշել է, որ թույլ չի տալու ՄԱԿ-ի որևէ կազմակերպության առաքելության մուտք Արցախ։
Էմմա Չոբանյան
