26.02.2026 | 21:37
Իսրայելը և Հնդկաստանը ստորագրել են 16 հուշագիր` խորացնելով ռազմավարական գործընկերությունը
Բաքուն արձագանքել է Լաչինի միջանցքը բացելու՝ ԱՄՆ Պետքարտուղարության կոչին
Քաղաքականություն
25.01.2023 | 13:25
Ադրբեջանի ԱԳՆ-ն արձագանքել է ԱՄՆ Պետքարտուղարության խոսնակ Նեդ Փրայսի՝ Լաչինի միջանցքը բացելու հերթական հայտարարությանը։
Մասնավորապես, Ադրբեջանի ԱԳՆ մամուլի խոսնակ Այխան Հաջիզադեն թվիթերյան գրառմամբ դիմել է Նեդ Փրայսին՝ կրկին կեղծ թեզերի մեջբերելով։
«Պետքարտուղարության հարգելի՛ խոսնակ, Ղարաբաղի շրջանում ավելի քան 1000 մեքենա մատակարարումներ է արել, ինչն ապացուցում է հակառակը, ինչ Դուք ասել եք հունվարի 24-ին։ Տեղին կլինի կոչ անել հայկական կողմին՝ կատարել պարտավորությունները և դադարեցնել անօրինական գործողությունները»,- ասվում է գրառման մեջ։
Հիշեցնենք, որ ճեպազրույցում Նեդ Փրայսը պետքարտուղար Էնթանի Բլինքենի՝ Հայաստանի և Ադրբեջանի առաջնորդների հեռախոսազրույցների հետ կապված լրագրողի հարցին ի պատասխան նշել էր, որ ԱՄՆ Պետքարտուղարությունը հույս ունի, որ Երևանի և Բաքվի միջև կվերսկսվի ուղիղ երկխոսություն, ինչը կհանգեցնի այն հարցերի կարգավորմանը, որոնց շուրջ կողմերը տարաձայնություններ ունեն։
«Մենք մտահոգված ենք, որ այնտեղ իրավիճակը վատթարանում է: Լեռնային Ղարաբաղում հումանիտար իրավիճակի վատթարացումը ոչ միայն պետքարտուղարի, այլև այս շենքի այլ աշխատողների ուշադրության կենտրոնում է։ Լաչինի միջանցքի երկայնքով առևտրային և մասնավոր երթևեկության շարունակական խոչընդոտումը հանգեցնում է սննդամթերքի, վառելիքի և դեղորայքի պակասի առաջացմանը միջանցքից կախված բնակչության համար, ինչպես նաև խաթարում է այստեղ առաջին անհրաժեշտության ապրանքների հիմնական մատակարարումները: Բնական գազի և այլ հիմնական կոմունալ ծառայությունների մատակարարման խափանումն է՛լ ավելի է սրում վատթարացող հումանիտար իրավիճակը: Մենք կոչ ենք անում լիովին վերականգնել ազատ տեղաշարժը միջանցքով, ներառյալ՝ առևտրային և մասնավոր երթևեկության համար: Մենք կարծում ենք, որ անհրաժեշտ է լուծում գտնել՝ այս փակուղուց դուրս գալու համար, որը կապահովի այստեղ ապրող բնակչության անվտանգությունն ու բարեկեցությունը: Մենք հավատացած ենք, որ անհրաժեշտ է առաջ շարժվել բանակցությունների միջոցով, և հավատարիմ ենք կայուն խաղաղությանն աջակցմանը»,- ասել էր Փրայսը։
Էմմա Չոբանյան
