26.02.2026 | 20:05
«Այվազովսկի» օգտատերը ձերբակալվել է տիկտոկում Փաշինյանի հասցեին վիրավորանքի համար՝պնդում է փաստաբանը. ՏԵՍԱՆՅՈՒԹ
CNN-ը հայտնում է ՌԴ իշխանությունների՝ ևս 200,000 մարդու մոբիլիզացնելու ծրագրերի մասին․ Կրեմլը հերքում է
Քաղաքականություն
25.01.2023 | 14:09
Կրեմլի խոսնակ Դմիտրի Պեսկովը ոչ հավաստի է համարել CNN հեռուստաալիքի տեղեկությունն այն մասին, որ ՌԴ իշխանությունները պատրաստվում են մոբիլիզացնել ևս 200 հազար մարդու, գրում է Meduza-ն։
Պեսկովին, մասնավորապես, հարցրել են՝ արդյո՞ք CNN-ի պատմությունը «նույնքան անվստահելի է, որքան նախկինում սոցցանցերում այս թեմայով տարածված լուրերը», ինչին Պեսկովը պատասխանել է․ «Այո՛, անվստահելի է»։
CNN-ը նախօրեին հաղորդել է, որ Ռուսաստանի նախագահ Վլադիմիր Պուտինը քննարկում է մոբիլիզացիայի ևս մեկ փուլ անցկացնելու և մինչև 200,000 մարդու զորակոչելու հնարավորությունը։ Հեռուստաալիքին այս մասին հայտնել են հետախուզական տվյալներին ծանոթ ամերիկացի և արևմտյան պաշտոնյաները։ Աղբյուրները ենթադրում են, որ մոբիլիզացիայի նոր ալիքն «ավելի հանգիստ» է լինելու։
Արևմտյան հետախուզության բարձրաստիճան պաշտոնյան լրատվամիջոցին ասել է, որ Պուտինը դեռևս վերջնական որոշում չի կայացրել մոբիլիզացիայի նոր փուլի անցկացման վերաբերյալ, քանի որ «գրեթե անկասկած, նա մտահոգված է հանրային ընդվզմամբ և տնտեսական բացասական հետևանքներով»:
Դեկտեմբերի վերջին և հունվարի սկզբին Ուկրաինայի իշխանությունները բազմիցս հայտարարել էին, որ Ռուսաստանում մոբիլիզացիայի նոր ալիք է լինելու։ Ուկրաինայի ռազմական հետախուզությունը պնդում է, որ ՌԴ-ն ծրագրում է մոբիլիզացնել մինչև 500,000 մարդու։
Էմմա Չոբանյան
