25.11.2024 | 11:40
ՌԴ-ն ակնկալում է հասնել Հայաստանի հետ ապրանքաշրջանառության ռեկորդային ցուցանիշի՝ 14-16 միլիարդ դոլարի․ Սերգեյ Կոպիրկին
Ստոլտենբերգը քննադատել է Էրդողանի դիրքորոշումը ՆԱՏՕ-ին Շվեդիայի անդամակցության հարցում
Քաղաքականություն
24.01.2023 | 13:05
ՆԱՏՕ-ի գլխավոր քարտուղար Յենս Ստոլտենբերգը քննադատել է Թուրքիայի նախագահ Ռեջեփ Թայիփ Էրդողանի դիրքորոշումը, որը նախօրեին հայտարարել է, թե Շվեդիան Հյուսիսատլանտյան դաշինքին միանալու հարցում չպետք է հույս դնի Անկարայի աջակցության վրա՝ Ստոկհոլմում Ղուրանի հրկիզման ակցիայից հետո, գրում է DW-ի ռուսական ծառայությունը։
Welt հեռուստաալիքին տված հարցազրույցում Ստոլտենբերգն ասել է, որ արտահայտվելու ազատությունն ու մտքի ազատությունն արժեքավոր են ինչպես Շվեդիայում, այնպես էլ ՆԱՏՕ-ի այլ երկրներում։
«Եվ դրա համար այդ ոչ տեղին գործողություններն ավտոմատ անօրինական չեն»,- ասել է դաշինքի գլխավոր քարտուղարը՝ նշելով, որ Շվեդիայի կառավարությունը «շատ հստակ ձևով» դատապարտել է ակցիան։
Հավելենք, որ Էրդողանը նախօրեին հայտարարել էր, թե պետք չէ ակնկալել Շվեդիային Անկարայից աջակցություն ՆԱՏՕ-ին անդամակցելու հայտի վավերացման հարցում՝ այդ երկրի իշխանությունների կողմից Ստոկհոլմում հակաթուրքական գործողություններ իրականացնելուց և Ղուրանը հրկիզելուց հետո։
«Նրանք, որոնք թույլ են տվել նման խայտառակություն կատարվի Ստոկհոլմում Թուրքիայի դեսպանատան առջև, չպետք է մեզանից որևէ լավություն սպասեն ՆԱՏՕ-ին անդամակցելու իրենց դիմումի վերաբերյալ։ Եթե Շվեդիան չի հարգում Թուրքիային, ինչպես նաև մահմեդականների կրոնական զգացմունքները, նա չի ստանա մեզանից որևէ աջակցություն ՆԱՏՕ-ին անդամակցելու մասով»,- ասել էր Էրդողանը։
Հիշեցնենք՝ Թուրքիան և Հունգարիան ՆԱՏՕ-ի անդամ այն երկրներն են, որոնք դեռ չեն վավերացել Շվեդիայի և Ֆինլանդիայի՝ դաշինքին միանալու հայտերը։
Էմմա Չոբանյան
