16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Պուտինը հայտարարել է, որ ՌԴ-ն Ուկրաինայում «հատուկ ռազմական գործողությունը» սկսել է՝ «դադարեցնելու պատերազմը»
Քաղաքականություն
18.01.2023 | 19:51
ՌԴ նախագահ Վլադիմիր Պուտինը հայտարարել է, որ Ռուսաստանը «հատուկ ռազմական գործողություն» է սկսել՝ դադարեցնելու ռազմական գործողությունները, որոնք Ուկրաինայում շարունակվում են 2014 թվականից։ Այս մասին նա հայտարարել է Երկրորդ համաշխարհային պատերազմի վետերանների և պաշարված Լենինգրադի բնակիչների հետ հանդիպմանը, որը տեղի է ունեցել հունվարի 18-ին Սանկտ Պետերբուրգում, գրում է Meduza-ն։
«Լայնածավալ ռազմական գործողությունները Դոնբասում չեն դադարել 2014 թվականից՝ ծանր տեխնիկայի, հրետանու, տանկերի, ավիացիայի կիրառմամբ։ Այն ամենը, ինչ մենք այսօր անում ենք, այդ թվում՝ հատուկ ռազմական գործողությունը, ինչպես ես բազմիցս ասել եմ, այդ պատերազմը դադարեցնելու փորձ է։ Դա է մեր գործողության իմաստը: Եվ պաշտպանելը մեր ժողովրդին, որն ապրում է այս տարածքներում»,- ասել է Պուտինը։
Նրա խոսքով՝ ՌԴ-ն Դոնբասը համարում է իր պատմական տարածքը և պատմականորեն «հաշտվել» է այն բանի հետ, որ ԽՍՀՄ փլուզումից հետո դրանք անցել են Ուկրաինային։ Բայց ռուսական իշխանությունները, ըստ նրա, «չէին կարող չարձագանքել այն ամենին, ինչ սկսեց տեղի ունենալ» Ուկրաինայում 2014 թվականի Եվրամայդանից և իշխանափոխությունից հետո, «երբ սկսեցին բնաջնջել այդ տարածքներում ապրող մարդկանց»։
Պուտինը հավելել է, որ ռուսական իշխանությունները «համբերել են» ու «փորձել պայմանավորվել»՝ իրավիճակը խաղաղ ճանապարհով լուծելու համար, սակայն ուկրաինական կողմը, ըստ նրա, պատրաստվում էր «հակամարտությունը տեղափոխել սուր և թեժ փուլ»։
«Մեզ ոչինչ չէր մնում՝ բացի այն, ինչ հիմա անում ենք»,- հայտարարել է Պուտինը։
Էմմա Չոբանյան
