16.12.2025 | 21:45
Նոր պահանջներ Երևանին` TRIPP-ի վերաբերյալ. ինչու Մոսկվան և Թեհրանը խոսեցին միաժամանակ. ՏԵՍԱՆՅՈՒԹ
Եվրոպական երկրներին գազ տալով՝ Բաքուն փակել է նրանց աչքերն ու ականջները․ Լիլիթ Ստեփանյան. ՏԵՍԱՆՅՈւԹ
Քաղաքականություն
17.01.2023 | 18:57
ՀՀ Ազգային ժողովում հայտարարությունների ժամ է։ «Քաղաքացիական պայմանագիր» խմբակցության պատգամավոր Լիլիթ Ստեփանյանը քաղաքակիրթ մարդկության և մարդու իրավունքների պաշտպանությամբ զբաղվող կառույցների ուշադրությունը հրավիրեց Արցախում առաջացած հումանիտար աղետի վրա։
«Ձեզանից շատերը իրենց ասելիքը ասել են, բայց մենք նաև անելիք ենք սպասում։ Կոչերը, շատ խորը և խորը մտահոգությունները մեզ և մեր պետության համար ճակատագրական են։ Իսկ անելիք վստահաբար կա՝ սանկցիաների կիրառում, ինչը, ցավոք հապաղում է»,- նշեց Ստեփանյանը։
Պատգամավորը հիշեցրեց, որ օրեր առաջ լրացավ Բաքվի ջարդերի 33-րդ տարելիցը։
«Հայերի ջարդերը Ադրբեջանի միայն Բաքու քաղաքում չէ, որ տեղի են ունեցել և միայն նշված թվին չէ, որ կատարվել են։ Նույն էր իրավիճակը հայության համար նաև 1905 թվականին, 1918 թվականին։ Նույն ջարդերն էին մեծ ու փոքր քաղաքներում ՝ Գանձակում, Սումգայիթում և այլուր։ Դժվար է ասել, թե քանի հայ սպանվեց այդ օրերին՝ մարդկությանը հայտնի կամ անհայտ բռնության ձևերով, որոնց նկարագրությունը կարող է անգամ ուշաթափություն առաջացնել սովորական մարդու մոտ։ Ջարդերն սկսվել էին այս օրերին՝ հունվարի 13-ին և տևեցին մոտ մեկ շաբաթ, որոնց հետևանքով տնից-տեղից զրկվեց և արտաքսվեց ավելի քան 200 հազար հայ։
Հունվարի 13-ը աշխարհի մեծ մասի մոտ ընդունված է որպես հին Նոր տարի։ Բաքվի բռնապետական քաղաքական համակարգը, որի էությունը ու բովանդակությունը տարիների ընթացքում տրանսֆորմացիա չի ապրել, իր քաղաքացիներին շնորհավորելու տարօրինակ մեթոդներ է ընտրում, որոնք դեմ են մարդկության, մարդու և մարդկային տրամաբանության բոլոր կանոններին։ Ապացույց՝ վերը նշածս ջարդերը միակ հանցագործությունները չեն, որը կատարվել են Բաքվի կողմից։ Բոլորիս հիշողության մեջ թարմ են 44-օրյա պատերազմի դեպքերը, գնդակոծվող գործող ծննդատունը, ֆոսֆորային զենքերը։ Բոլորիս հիշողության մեջ թարմ են սեպտեմբերյան ռազմական գործողությունների դեպքերը և այս օրերին Լաչինի միջանցքի փակումը։ Ի դեպ, այսօր լրանում է 36-րդ օրը»,- ընդգծեց Ստեփանյանը։
Պատգամավորի խոսքով՝ Ալիևը բոլոր տեղերում հայտարարում է, թե արցախցիներն իր քաղաքացիներն են և իրենք պաշտպանված են, ինչպես Ադրբեջանի ցանկացած քաղաքացի, և սովի է մատնում 120 հազար քաղաքացու՝ փակելով առաջին սպառման մթերքների ճանապարհը, անջատելով հոսանքը, այսօր էլ՝ գազը։
«Ինչո՞ւ, որովհետև գիտի՝ անպատիժ է մնալու, որովհետև եվրոպական երկրներին գազ տալով՝ փակել է իր պարտքերն ու թեմաները, իսկ նրանց աչքերն ու ականջները»,- հավելեց Ստեփանյանը։
Մանրամասները՝ տեսանյութում։
