26.02.2026 | 23:14
Դավոսի Համաշխարհային տնտեսական ֆորումի նախագահը հրաժարական է տվել Էփշտեյնի հետ կապերի պատճառով
2022թ․ Չինաստանի բնակչությունը 60 տարվա մեջ առաջին անգամ նվազել է
Քաղաքականություն
17.01.2023 | 23:21
Անցյալ տարվա դեկտեմբերի վերջին աշխարհի ամենաբնակեցված երկրում՝ Չինաստանում, ապրում էր 1,411 միլիարդ մարդ, ինչը 850 հազարով պակաս է նախորդ տարվա համեմատ: Այս մասին հայտնել է ՉԺՀ-ի վիճակագրության պետական բյուրոն։ Այսպիսով, երկրի բնակչությունը 2022 թվականին վեց տասնամյակների ընթացքում առաջին անգամ նվազել է, նշել է dpa գործակալությունը, գրում է DW-ի ռուսական ծառայությունը։
Ծնելիության մակարդակը կազմել է ընդամենը 6,77 նորածին՝ 1000 մարդու հաշվով․ ամենացածր ցուցանիշը վերջին տասնամյակների ընթացքում:
2022 թվականին ծնվածների թիվը (9,56 մլն) ավելի ցածր է եղել մահացածների թվից (10,41 մլն)։ Մինչ այս նման անկում գրանցվել էր 1960 և 1961 թվականներին՝ ինդուստրացման աղետալի հետևանքներից հետո սաստիկ սովի ֆոնին։
Փորձագետների գնահատականների համաձայն՝ Չինաստանը երկար ժամանակ է՝ տառապում է ծնելիության կտրուկ նվազումից ու բնակչության ծերացումից։ 2015 թվականին «Մեկ ընտանիք՝ մեկ երեխա» ժողովրդագրական քաղաքականության չեղարկումը հանգեցրել է ցուցանիշների բարձրացման, սակայն միայն աննշան ու կարճ ժամանակաշրջանում։
Մասնագետները կարծում են, որ պատճառը բնակարանների, կրթության ու առողջապահության բարձր արժեքն է Չինաստանում, ինչպես նաև ընտանիք կազմելու ձգտման նվազումը։ Համաճարակը, ըստ ամենայնի, խորացրել է այս միտումը։
Տաթև Ֆռանգյան
