16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Անկարան Աթենքին կոչ է անում հրաժարվել «սխալ հաշվարկներից»․ Թուրքիայի ՊՆ ղեկավարը կրկին սպառնացել է Հունաստանին
Քաղաքականություն
09.01.2023 | 21:25
Թուրքիան թույլ չի տա Էգեյան ծովում Հունաստանի տարածքային ջրերի ընդլայնում ներկա 6 մղոնից, ինչպես նաև՝ տարածաշրջանում ստատուս-թվոյի ձևավորում Անկարայի շահերի դեմ։ Այս մասին հայտարարել է Թուրքիայի ՊՆ ղեկավար Հուլուսի Աքարը Քոջաելի նահանգում, գրում է Անադոլու գործակալությունը։
Նա կրկին սպառնացել է ու կոչ արել Աթենքին հրաժարվել «սխալ հաշվարկներից» ու չձգտել տարածաշրջանում էսկալացիայի նոր փուլերի։
«Աթենքը պետք է հիշի պատմության դասերը։ Թուրքիան չի գնում հունական կողմի սադրանքների հետևից, բայց միևնույն ժամանակ թույլ չի տա, որ տարածաշրջանում ստեղծվեն այնպիսի պայմաններ, որոնք ոտնահարում են թուրքական կողմի իրավունքները»,-ասել է Աքարը՝ նշելով, որ Աթենքը հակաթուրքական պլաններում «չպետք է ապավինի երրորդ ուժերի աջակցությանը»։
Թուրք նախարարը վերահաստատել է տարածաշրջանում իր շահերը պաշտպանելու Թուրքիայի վճռականությունը։
Մեկնաբանելով հունական կողմի հայտարարությունները Կրետե կղզու տարածքային ջրերը 6-ից մինչև 12 մղոն ընդլայնելու առաջիկա քայլերի վերաբերյալ՝ Հուլուսի Աքարն ասել է. «Մենք դա չենք ընդունի։ Ընդամենը 6 մղոն»։
Նա նաև նշել է, որ Թուրքիան՝ որպես Կիպրոսի երաշխավոր երկրներից մեկը, թույլ չի տա ինքնահռչակ Հյուսիսային Կիպրոսի Թուրքական Հանրապետության իրավունքների ոտնահարում։
Էմմա Չոբանյան
