25.11.2024 | 17:11
ՀՀ ԱԳՆ-ի արձագանքը «ադրբեջանական Երևան» միջոցառում անցկացնելու վերաբերյալ հրապարակումներին
Ադրբեջանի ԱԳ փոխնախարարը պաշտոնական այցով Իսրայելում է
Քաղաքականություն
29.12.2022 | 21:42
Ադրբեջանի ԱԳ փոխնախարար Ֆարիզ Ռզաևը պաշտոնական այցով Իսրայելում է։ Այս մասին հայտնում է ադրբեջանական «Թուրան» գործակալությունը՝ վկայակոչելով իսրայելական ԶԼՄ-ներին։
Նշվում է, որ Ռզաևը վերահսկելու է Թել Ավիվում Ադրբեջանի դեսպանատան բացման նախապատրաստական աշխատանքները։
Պաշտոնյայի խոսքով՝ «երկու երկրների հարաբերություններում դիվանագիտական ներկայացուցչության բացմամբ գրեթե անսահմանափակ հնարավորություններ կստեղծվեն»։ Նա նշել է, որ դեսպանատան բացումը թույլ կտա ընդլայնել երկու երկրների փոխգործակցությունն ու կբացի համագործակցության նոր ուղիներ տնտեսության, զբոսաշրջության, մշակույթի, գիտական հետազոտությունների և շատ այլ ոլորտներում։
«Ադրբեջանի փոխարտգործնախարարի այցի ծրագրում նախատեսված է հանդիպում «Մոսադ»-ի նախկին ղեկավար Թամիր Պարդոյի հետ, որը մեծ հեղինակություն է վայելում Ադրբեջանում։ Բացի այդ, Ֆարիզ Ռզաևը հանդիպումներ կունենա Իսրայելի ԱԳ նախարարության ներկայացուցիչների հետ»,- հայտնում է լրատվամիջոցը։
Հավելենք, որ պաշտոնական Բաքուն չի հայտարարել Ֆարիզ Ռզաևի Իսրայել այցի մասին։
Հիշեցնենք, որ նոյեմբերին Ադրբեջանի Միլի Մեջլիսն Իսրայելում դեսպանատուն բացելու որոշում էր ընդունել, որը մեծ ոգևորությամբ է ընդունվել Իսրայելի իշխանությունների շրջանում։
Էմմա Չոբանյան
