14.12.2025 | 16:37
Ֆիշինգը թիվ 1 կիբեռսպառնալիքն է այսօր․ Մխիթար Հայարապետյան
Իշխանությունը բաց խոստովանեց ՌԴ-ի շանտաժը․ քա՛յլ կատարեք՝ ՀԱՊԿ-ից դուրս գալով և Արևմուտքի հետ լուրջ աշխատանքով․ Հրաչյա Արզումանյան. ՏԵՍԱՆՅՈՒԹ
Քաղաքականություն
27.12.2022 | 20:02
Մինչև վերջերս ՀՀ պաշտոնյաները խուսափում էին բաց խոսել ՌԴ-ի կողմից ՀՀ-ի վրա բանեցվող ճնշումների մասին, որոնք կատարվում են միջանցք ստանալու, ՀՀ-ն Միութենական պետություն մտցնելու նպատակներով։
Վերջերս բաց տեքստով այդ ճնշումների մասին Factor TV-ի տաղավարում հայտարարեց ԱԺ ՔՊ խմբակցության պատգամավոր Գագիկ Մելքոնյանը։ Իսկ ոչ ուղիղ տեքստով՝ անուղղակի ՌԴ-ից բանեցվող ճնշումների մասին Առաջին ալիքի եթերում հայտարարեց ՀՀ ԱԽ քարտուղար Արմեն Գրիգորյանը։ Նա թե՛ սեպտեմբերի 13-ի ռազմական ագրեսիաները, թե՛ միջանցքի փակումը նա տեղավորեց Ադրբեջանի և ՌԴ-ի կողմից ՀՀ-ից միջանցք պահանջելու, Միութենական պետություն մտնելու պահանջների համատեքստում։
Ի՞նչ պետք է հետևի այս բաց խոստովանություններին։ Քաղաքական գիտությունների դոկտոր, Ազգային անվտանգության և ռազմական հարցերով փորձագետ Հրաչյա Արզումանյանը Factor TV-ի հարցազրույցում ասում է՝ երբ ՀՀ իշխանություններն արդեն բաց են խոստովանում ճնշումների փաստը ՌԴ-ից, և արվել են վերլուծություններ, ժամանակն է, որ կոնկրետ քայլեր կատարվեն․
«Եթե քո դեմ նման ճնշում է գործադրվում, պետք է պատասխանես։ Եթե շանտաժ են անում, պետք է դրա պատասխանը լինի ուժային մեթոդներով։ Հայկական դիվանագիտությունն ունի նման քայլերի հնարավորություն և տեղ։ Այո, այսօր ՀՀ-ն մեծ կախվածության մեջ է ՌԴ-ից, բայց գուցե պարադոքսալ թվա՝ նույնքան ՌԴ-ն է կախված ՀՀ-ից։ Ժամանակն է իրենցից կտրվել, այդ կախվածությունը հաղթահարել՝ ՀԱՊԿ-ից դուրս գալով և Արևմուտքի հետ լրջագույն աշխատանք տանելով։ Առաջին քայլը պետք է լինի ՌԴ-ի ռազմական ներկայացվածությունը ՀՀ-ում փոքրացնելը և սկսելը ՀԱՊԿ-ից դուրս գալ։ Եթե քո դեմ կազմակերպվում է բազմաէտապ ճնշում, և զիջումներ են փորձում վերցնել, դու նույն ձևի կարող ես անել քո քայլերը։ Իրենք բլոկադայի մեջ են դրել Արցախի հայությանը, դու դուրս ես գալիս ՀԱՊԿ-ից։ Եթե շարունակվում է բլոկադան, դու պետք է անես հաջորդական քայլեր։ Պետք է նվազեցնես ռուսական ազդեցությունը՝ կտրելով քո կապերը ուժային կառույցներում»,- նշեց փորձագետը։
Հարցազրույցն ամբողջությամբ՝ տեսանյութում։
Ռոբերտ Անանյան
