Եկող տարի մեծածավալ ռազմական սադրանքները հավանական են․ Սուրեն Պետրոսյան. ՏԵՍԱՆՅՈՒԹ

2020 թվականի 44-օրյա պատերազմից հետո Ադրբեջանը Հայաստանի նկատմամբ ճնշման տարատեսակ գործիքակազմեր է կիրառում՝ ռազմական հարձակումներ, գերեվարումներ, նոյեմբերի 9-ի հայտարարության կետերի անտեսում, անգամ՝ ռազմագերիներին ամբողջությամբ չվերադարձնել։ Բացի այդ, կան նաև ճնշման ավելի «մեղմ» միջոցներ, ինչպես օրինակ, «էկոշարժման» քողի ներքո Արցախը բլոկադայի ենթարկելն է և հումանիտար ճգնաժամի հարուցումը։

Ռազմական մեծածավալ գործողությունների ռիսկ Ադրբեջանի կողմից առկա՞ է։ «Ժողովրդավարական համախմբում» կուսակցության նախագահ, քաղաքագետ Սուրեն Պետրոսյանը Factor TV-ի հարցազրույցում ասում է, որ լայնամասշտաբ պատերազմի ռիսկ այս պահին չի տեսնում, սակայն ռազմական գործողություններ լինելու են մշտապես․ «Եկող տարի կարող է ավելի մեծ ռազմական գործողություններ լինեն։ Մենք չենք կարող ասել, թե գերտերությունների ուժի հարաբերակցությունը դեպի ուր կտեղափոխվի, և այդ պետությունները դա ինչպես կօգտագործեն իրենց շահերին համապատասխան։

ՀՀ-ն չի կարող սա օգտագործել իր շահերին համապատասխան։ ՀՀ-ն միայն ազդեցության կրող է։ Երկու տարվա մեջ այդպես էլ քայլեր չարվեցին կարողունակ պետություն ձևավորելու ուղղությամբ»։

Սուրեն Պետրոսյանի ներկայացմամբ՝ Ադրբեջանի ուղեղային կենտրոնները նշում են, որ Ադրբեջանը պետք է օկուպացնի նույնքան տարածքներ, ինչքան ՀՀ-ն էր օկուպացրել, և այդքան ժամանակ իրենք նույնպես պետք է ապրեն օկուպացված տարածքներում, ինչն ըստ քաղաքագետի, սոցիալ-հոգեբանական մակարդակում ՀՀ-ին պատասխան տալու պրոցես է։ Այսպիսի նպատակադրման պայմաններում, ըստ նրա, անիմաստ է անգամ խոսել կամ մտածել խաղաղության պայմանագիր կնքելու մասին։

Հարցազրույցն ամբողջությամբ՝ տեսանյութում։

Ռոբերտ Անանյան