05.11.2024 | 23:30
ԱՄՆ նախագահական ընտրությունների արդյունքները դժվար թե վերականգնեն Թուրքիայի հետ հարաբերությունները. անդրադարձ
ԱՄՆ-ում և Կանադայում աննախադեպ սառնամանիքներ են․ Սուրբ Ծննդին միլիոնավոր մարդիկ մնացել են առանց լույսի
Քաղաքականություն
24.12.2022 | 19:44
Ծայրահեղ եղանակային նախազգուշացումները գործում են ԱՄՆ 12 նահանգներում: Սաստիկ սառնամանիքները, ուժեղ քամին և ձյան առատ տեղումներն արդեն 19 մարդու մահվան պատճառ են դարձել, փոխանցում է BBC-ի ռուսական ծառայությունը։
Երկրի ավելի քան մեկուկես միլիոն բնակիչներ մնացել են առանց էլեկտրականության, չեղյալ են հայտարարվել հարյուրավոր չվերթներ։
Հզոր ձմեռային փոթորիկն ընդգրկել է 3200 կմ տարածք՝ Տեխասից մինչև Քվեբեկ։ Կանադայի զգալի տարածքը նույնպես հայտնվել է փոթորկի գոտում: Օնտարիոյում և Քվեբեկում սաստիկ սառնամանիքների հետևանքով հարյուր հազարավոր մարդիկ առանց էլեկտրականության են մնացել։
Կանադայի տարածքի մեծ մասը՝ Բրիտանական Կոլումբիայից մինչև Նյուֆաունդլենդ, հայտնվել է խիստ ցրտերի պայմաններում։ Բնակիչներին զգուշացնում են եղանակի հետագա վատթարացման մասին։
ԱՄՆ Ազգային օդերևութաբանական ծառայությունը նշում է, որ սա առաջին լայնածավալ ցրտերն են դիտարկումների ողջ պատմության ընթացքում. երկրի գրեթե ողջ տարածքը հայտնվել է ձմեռային փոթորկի ճիրաններում։
Օդի ջերմաստիճանը Մոնտանա նահանգում ուրբաթ նվազել մինչև -45 աստիճան ըստ Ցելսիուսի։ Միչիգանում ուրբաթ գիշերը ջերմաստիճանն իջել է մինչև -17 աստիճան Ցելսիուս։ Փենսիլվանիայում ձյան հզոր տեղումներ են կանխատեսվում։
Միևնույն ժամանակ, ափամերձ շրջաններում ՝ Նոր Անգլիայում, Նյու Յորքում և Նյու Ջերսիում, նկատվում է ափամերձ գծի ջրհեղեղ:
Նույնիսկ զգալիորեն հարավ գտնվող Լուիզիանա, Ալաբամա, Ֆլորիդա և Ջորջիա Նահանգները նախազգուշացումներ են ստացել ջերմաստիճանի զգալի նվազման մասին։
Հարավային Դակոտայում բնիկ ամերիկյան ցեղերը վառելիքը սպառելուց հետո ստիպված էին այրել իրենց հագուստը՝ տաքանալու համար:
Առաջիկա Սուրբ Ծնունդը կարող է ամենացուրտը լինել ԱՄՆ-ում վերջին երեք տասնամյակների ընթացքում, կարծում են օդերևութաբանները:
