26.07.2026 | 23:49
ՃՏՊ՝ հրդեհի բռնկմամբ․ կան զոհեր և տուժածներ
Աշխարհի ամենահարուստ մարդիկ այս տարի կորցրել են գրեթե 2 տրիլիոն դոլար
Քաղաքականություն
23.12.2022 | 23:21
Forbes USA-ի գնահատմամբ՝ աշխարհի ամենահարուստ մարդիկ 2022 թվականին կորցրել են 1,9 տրիլիոն դոլար, իսկ ոմանք, ինչպիսիք են FTX հեջ-ֆոնդի հիմնադիր Սեմ Բենքմեն-Ֆրիդը, երաժիշտ Քանյե Ուեսթը և Rivian-ի հիմնադիր Ար-Ջեյնը, ընդհանրապես դուրս են մնացել միլիարդատերերի շարքից:
2022 թվականը կործանարար տարի էր ոչ միայն Քանյե Ուեսթի նման սեփական ձեռքերով իր բիզնեսը կործանած միլիարդատերերի կամ Սեմ Բենքմեն-Ֆրիդի նման ձերբակալվողների, այլև ավելի հաջողակ ձեռնարկատերերի համար: 2020 և 2021 թվականներին աշխարհի ամենահարուստ մարդկանց ընդհանուր ունեցվածքն ավելացել է տրիլիոն դոլարով, սակայն այս տարի նրանք կանգնած են երերուն ֆոնդային շուկայի, Ուկրաինայում Ռուսաստանի «հատուկ գործողության» և սողացող գնաճի առջև։
Forbes-ի գնահատմամբ՝ 2022 թվականին ամբողջ աշխարհում միլիարդատերերը կորցրել են 1,9 տրիլիոն դոլար։ Դեկտեմբերի 9-ի դրությամբ՝ նրանց ընդհանուր կարողությունը 13,8 տրիլիոն դոլարից նվազել է 11,9 տրիլիոն դոլարի: Միլիարդատերերի թիվը նույնպես 2,671-ից իջել է 2,523-ի՝ ըստ Forbes USA-ի։
Ամենաշատը տուժել են տեխնոլոգիական ոլորտի 300 միլիարդատերերը, որոնք այս տարի միասին կորցրել են 1 տրիլիոն դոլար: Օրինակ՝ Amazon-ի արժեթղթղերի գինը փլուզվել է գրեթե 50 տոկոսով, ինչի հետևանքով ընկերության հիմնադիր Ջեֆ Բեզոսը կորցրել է 80 միլիարդ դոլար։
Հրատարակությունն Իլոն Մասկին անվանել է ամենամեծ անհաջողակը։ Forbes-ի տվյալներով՝ 2022 թվականին նրա կարողությունը նվազել է 115 միլիարդ դոլարով։ Ընդհանուր առմամբ, ամերիկացի միլիարդատերերը միասին կորցրել են 660 միլիարդ դոլար, չինացի միլիարդատերերը՝ 620 միլիարդ դոլար, իսկ ռուս միլիարդատերերը՝ 150 միլիարդ դոլար:
Տաթև Ֆռանգյան
