Քաղաքականություն
23.12.2022 | 13:36
ՌԴ նախագահ Վլադիմիր Պուտինն Ուկրաինա ներխուժումն անվանել է «պատերազմ»՝ «հատուկ ռազմական գործողության» փոխարեն․ եզրույթ, որ պաշտոնյաներն օգտագործում էին հակամարտության 10 ամիսների ընթացքում, գրում է The Moscow Times-ը։
«Մեր նպատակն է ոչ թե պտտել ռազմական հակամարտության անիվը, այլ հակառակը՝ վերջ տալ այս պատերազմին։ Մենք դրան ձգտում ենք և կշարունակենք ձգտել»,- ասել է Պուտինը՝ հավելելով, որ որքան շուտ դա տեղի ունենա, այնքան լավ։
Ռուսաստանը, նախագահի խոսքով, երբեք չի հրաժարվել Ուկրաինայի հետ բանակցություններից՝ ի տարբերություն Կիևի իշխանությունների, որոնք «իրենք իրենց արգելում են» երկխոսել Ռուսաստանի Դաշնության հետ։
«Այնուամենայնիվ, վաղ թե ուշ, իհարկե, ցանկացած կողմ, որը գտնվում է կոնֆլիկտի մեջ, նստում է և պայմանավորվում։ Որքան շուտ այդ գիտակցումը հասնի մեզ հակառակվողներին, այնքան լավ»,- ասել է Պուտինը։
Ըստ Պուտինի՝ Ռուսաստանը հաշվի կառնի Կիևին Patriot հակաօդային պաշտպանության համակարգերի մատակարարման փաստը, որոնք նախատեսված են ենթակառուցվածքների գնդակոծումից պաշտպանվելու համար, ինչի արդյունքում միլիոնավոր ուկրաինացիներ մնացել են առանց էլեկտրականության և ջերմության։
«Այն բավականին հին համակարգ է և չի աշխատում, ինչպես, ասենք, մեր C-300-ները։ Այնուամենայնիվ, մեզ ընդդիմացողները ելնում են նրանից, որ սա պաշտպանական զենք է։ Դե լավ, միշտ էլ հակաթույն կգտնվի»,- ասել է Պուտինը։
ՌԴ նախագահի խոսքով՝ ամերիկյան զենքի մատակարարումը «միայն երկարացնում է հակամարտությունը»․ «Նրանք, ովքեր դա անում են, իզուր են անում»։
Տաթև Ֆռանգյան
