19.12.2025 | 02:04
Կոնֆերենցիաների լիգա․ Վահան Բիչախչյանը՝ գոլի հեղինակ․ ՏԵՍԱՆՅՈՒԹ
Թուրքիան ԱՄՆ-ի հետ բանակցություններ է վարում ամերիկյան միջուկային ռեակտորներ գնելու շուրջ
Քաղաքականություն
22.12.2022 | 21:44
Թուրքիայի կառավարությունը և մասնավոր ընկերությունները բանակցություններ են վարում ԱՄՆ-ի հետ փոքր միջուկային ռեակտորներ գնելու համար, քանի որ երկիրը ձգտում է հրաժարվել ածխից։ Այս մասին գրում է Bloomberg-ը, որին վկայակոչում է Turkish Minute-ը։
«Կա լուրջ հետաքրքրություն միջուկային ոլորտում՝ որպես ածխով աշխատող էլեկտրակայանները փոխարինելու միջոց»,-Անկարայում լրատվամիջոցին տված հարցազրույցում ասել է ԱՄՆ Պետքարտուղարության միջուկային էներգիայի առևտրային մրցունակության հարցերով ավագ խորհրդական Ջասթին Ֆրիդմանը:
Նա նշել է, որ հնարավորություն կա գնելու մինչև 35 փոքր մոդուլային ռեակտոր, որոնք հայտնի են որպես SMR։
«Այժմ հարցն այն է, թե ինչպես ենք մենք համագործակցում կառավարություն-կառավարություն մակարդակով՝ բիզնես-բիզնես համագործակցության դռները բացելու համար»,- ասել է Ֆրիդմանը։
ԱՄՆ-ում SMR-ներ արտադրողներից են NuScale Power Corp.-ն և Բիլ Գեյթսի կողմից աջակցություն ստացող TerraPower ՍՊԸ-ն: SMR-ները սովորաբար արտադրում են հարյուր մեգավատ կամ մի փոքր ավելին, ինչը կազմում է սովորական ռեակտորների չափի մոտավորապես տասներորդ մասը: Այս մասշտաբի ներդրումը կարժենա միլիարդավոր դոլարներ։ Անհասկանալի է, թե ինչպես կաշխատի ֆինանսավորումը, եթե բանակցությունները հանգեցնեն առևտրային գործարքի:
Թուրքիայի Էներգետիկայի նախարարությունը հրաժարվել է թեմայի շուրջ մեկնաբանությունից։ ԱՄՆ-ի հետ այս բանակցությունները տեղի են ունենում այն ժամանակ, երբ ռուսական պետական «Ռոսատոմ» ընկերությունը մոտենում է Թուրքիայի հարավում գտնվող «Աքքույու» ատոմակայանի շինարարության ավարտին: Կառավարությունը «Ռոսատոմ»-ի հետ բանակցություններ է վարում նաև երկրորդ էլեկտրակայանի շուրջ, որը կարող է կառուցվել Սինոպում՝ Սև ծովի ափին:
Թուրքիան ունի ածխով աշխատող 68 էլեկտրակայան, որոնք անցյալ տարի բավարարել են երկրի էլեկտրաէներգիայի կարիքների մոտ մեկ երրորդը։
Էմմա Չոբանյան
