Համայնքային հողերի վրա ինքնակամ շինություններ կառուցելը վերջացրին, հիմա էլ բազմաբնակարան շենքերի վրա են սարքում: Այս մասին այսօր Երևանի քաղաքապետարանում գործակարգավարական խորհրդակցության ժամանակ նշեց Երևանի քաղաքապետ Հրաչյա Սարգսյանը՝ անդրադառանալով Ամիրյան փողոցի շենքերից մեկի տանիքին կառուցված շինությանը։
Զեկուցվեց, որ կառուցողը սեփականության վկայական ունի, բայց շինթույլտվություն չունի, երկու անգամ կասեցվել է շինարարությունը:
«Այսինքն՝ կտուրին սեփականության վկայական ունի՞․․․ Կասեցվել է, բայց էս պահին դրված է: Հիմա 5 անգամ կկասեցնենք, գիշերով կդնեն: Կրա՞կն ենք ընկել: Ամիրյան փողոցի վրա է: Կարելի՞ է էդքան չսիրել Երևանը, ես չեմ պատկերացնում: Ի՞նչ է թե մի քառակուսի մետր բուդկա ավել ունենան, չուլան դնեն երևի ու զիբիլը լցնեն մեջը»,- նշեց Սարգսյանը:
«Ուզում եմ հասկանալ՝ դրանից շենքի մյուս բնակիչների իրավունքները չեն խախտվո՞ւմ»,- հետաքրքրվեց քաղաքապետը՝ դիմելով իրավաբանական վարչության պետ Տարոն Մարգարյանին։
«Կարող է խախտվում է, բայց այդ քաղաքացիներն իրենց իրավունքի խախտման համար պետք է դիմեն ինքնուրույն: Այսօր փաստաթղթերի փաթեթը կնայենք, մի լուծում կգտնենք: Մենք նաև օրենսդրական նախագիծ ունենք այս հարցի կարգավորման համար, որը դեռ քննարկման փուլում է: Այս պահին կփորձենք ինչ-որ միջանկյալ լուծումով մի բան կազմակերպել»-պատասխանեց իրավաբանական վարչության պետը։
Հրաչյա Սարգսյանն արձագանքեց. «Միջանկյալ լուծում գտեք, ամբարձիչը տարե՛ք, ապամոնտաժե՛ք դա Ամիրյանի վրայից: Ասեք՝ ինչ է պետք, ես անձամբ կգամ այնտեղ: Ես անձամբ կգամ էդ քաղաքացուն կտեսնեմ, տեսնեմ՝ ինչու է այլանդակում քաղաքը: Ես անձամբ կգամ, թող ինձ դատի տան․․․ Բազմաբնակարան շենքի վրա «բուդկա» են սարքում․ չի կարելի էդքան չսիրել մեր քաղաքը»:
Մանրամասները՝ տեսանյութում։
