07.08.2026 | 21:17
Իզյումի վրա ռուսական հարվածի հետևանքով 2 մարդ է զոհվել
Նախագահ Վահագն Խաչատուրյանն այցելել է գեղանկարիչ Հակոբ Հակոբյանի ընտանիքին․ ՏԵՍԱՆՅՈՒԹ
Հասարակություն
01.12.2022 | 12:02
Հանրապետության նախագահ Վահագն Խաչատուրյանն այցելել է գեղանկարիչ Հակոբ Հակոբյանի ընտանիքին, զրուցել նրա այրու Մարի Հակոբյանի և դստեր Նորա Հակոբյանի հետ: Հանդիպմանը ներկա է եղել նաև Երևանի քաղաքապետ Հրաչյա Սարգսյանը․ տեղեկացնում են ՀՀ նախագահի աշխատակազմից։
Թեյի սեղանի շուրջ անմիջական մթնոլորտում մեծանուն գեղանկարչի ընտանիքի անդամները նախագահին են ներկայացրել հաջորդ տարի Հակոբ Հակոբյանի հարյուրամյակին նվիրված միջոցառումների ծրագրերը:
Հանրապետության նախագահը նշել է, որ մեծանուն նկարչի հարյուրամյակին նվիրված մշակութային միջոցառումները պետք է իրականացվեն ամենաբարձր պետական հովանավորությամբ, Կրթության, գիտության, մշակույթի և սպորտի նախարարության անմիջական աջակցությամբ:
Մարի և Նորա Հակոբյանները Հանրապետության նախագահի հետ քննարկել են Հակոբ Հակոբյանի գործերի մշտական ցուցադրության ցուցասրահ-թանգարան ունենալու հարցը, որը կարևոր նշանակություն կունենա գեղանկարչի ստեղծագործությունների պահպանության և հանրային հասանելիության տեսանկյունից:
Նախագահ Խաչատուրյանն իր խոսքում առանձնահատուկ կարևորել է նման թանգարանի ստեղծման անհրաժեշտությունը: Երևանի քաղաքապետ Հրաչյա Սարգսյանն էլ իր հերթին նշել է, որ քննարկվում են մի շարք տարբերակներ և նկարչի ընտանիքի անմիջական մասնակցությամբ խնդրի վերաբերյալ որոշում կկայացվի:
Հանրապետության նախագահը պատրաստակամություն է հայտնել հնարավորինս աջակցել և իր ուշադրության կենտրոնում պահել մեծանուն նկարչի հարյուրամյակին և հիշատակին նվիրված ծրագրերի ընթացքը:
