15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Մասիսի փոխքաղաքապետը կշարունակի մնալ ազատության մեջ․ դատարանը մերժեց դատախազին
Հասարակություն
06.06.2018 | 12:56
Մասիսի փոխքաղաքապետ Կարեն Օհանյանին կալանավորելու երկրորդ միջնորդությունն այսօր Կենտրոն և Նորք-Մարաշ վարչական շրջանների ընդհանուր իրավասության դատարանը մերժեց, քանի որ չգտավ միջնորդությունը բավարարելու հիմնավոր պատճառներ։
Այս մասին factor.am-ի հետ զրույցում ասաց Կարեն Օհանյանի պաշտպան Զորայր Հարությունյանը՝ հավելելով, որ կալանավորման միջնորդություն ներկայացրած քննիչը չէր ներկայացրել տեսագրությունների վերաբերյալ արձանագրություն։
«Երեկ երեկոյան անակնկալ կերպով իմացանք, որ դատախազությունը ևս մեկ միջնորդություն է ներկայացրել գործը քննող դատավորին Կարեն Օհանյանին կալանավորելու վերաբերյալ։ Նշվել էր, որ դատարան են ներկայացվելու նոր ապացույցներ, սակայն պարզվեց, որ դատարան նեկայացված ծեծի վերաբերյալ տեսաձայնագրությունը նոր չէր, այն արդեն ուսումնասիրվել է այս գործով, բովանդակային մասով նորություն չկար, և, հետևաբար, դատարանը չհամաձայնեց դատախազի հետ»,- ասաց Պաշտպանը։
Հարցին՝ հնարավո՞ր է ևս մեկ միջնորդություն ներկայացվի, պաշտպանը պատասխանեց․«Էսպես որ գնա ամեն ինչ հնարավոր է, հնարավոր է և՛ 3-րդ, և՛ 4-րդ միջնորդությունների ականատես լինենք»։
Նշենք, որ 2018 թվականի հունիսի 2-ին Երևան քաղաքի ընդհանուր իրավասության դատարանի որոշմամբ արդեն մերժվել է մեղադրյալ Կարեն Օհանյանի նկատմամբ կալանավորումը որպես խափանման միջոց կիրառելու մասին քննիչի միջնորդությունը՝ մեղադրյալին վերագրվող հանցագործությունը վերջինիս կողմից կատարած լինելու մասին հիմնավոր կասկածի բացակայության պատճառաբանությամբ:
