Հայերին խաբեությամբ փորձել են հավաքագրել․ ՌԴ-ի մոբիլիզացիան և Պուտինի նոր հրամանագիրը․ ՏԵՍԱՆՅՈՒԹ

Օրերս ՌԴ նախագահ Վլադիմիր Պուտինը հրամանագիր ստորագրեց, որը թույլ է տալիս բանակ զորակոչել ոչ միայն ՌԴ քաղաքացիներին։ Նոր կարգի համաձայն՝ պայմանագրային ծառայության կարող են մեկնել այլ երկրի քաղաքացիներ, ինչը մինչ այդ արգելված էր։ Բացի այդ, ժամկետային զինծառայության ենթակա են երկքաղաքացիություն ունեցողները։

Ըստ իրավապաշտպան Արթուր Սաքունցի՝ սա պատերազմում լրացուցիչ մարդկային ռեսուրսներ ներգրավելու համար է, ինչի կարիքը Ռուսաստանը հիմա շատ ունի։ Սա լուրջ խնդիր է՝ ասում է Սաքունցը․ ստացվում է՝ զորակոչի ենթակա են երկքաղաքացիություն ունեցողները, այդ թվում՝ հայերը։ Ըստ իրավապաշտպանի՝ Ռուսաստանի դեպքում դա զարմանալի չէ, այստեղ մարդու իրավունքները բոլոր առումներով ոտնահարված են։

Կարգավորումը կարող է տարածվել նաև ՀՀ-ում ապաստանած ՌԴ քաղաքացիների վրա, ովքեր այստեղ ձեռք են բերել կացության իրավունք, այդ թվում՝ հայերի։ Ըստ Սաքունցի՝ ՌԴ-ն կարող է դիմել Հայաստանի իրավապահներին և արտահանձնում պահանջել։

Այն, որ շատերը՝ թե՛ ազգությամբ հայ, թե՛ ռուս, պարզապես փախել են Ռուսաստանից հենց պատերազմական գործողությունների հետևանքով, անհերքելի փաստ է։ ՌԴ-ում դեռևս սեպտեմբերին հայտարարված մոբիլիզացիայից հետո դեպի Հայաստան ներհոսքը մեծացավ։

Վերջին փոփոխությունից հետո կրկին մեծ հոսք կարելի է ակնկալել՝ ասում է միգրացիոն հարցերով փորձագետ Տաթևիկ Բեժանյանը։ Ինչ վերաբերում է օտարերկրացիներին զինծառայության ներգրավելու գործընթացին, ապա Ռուսաստանը դեռ ավելի վաղ էր փորձել դա անել։ Ռուսաստանում շուրջ 6 միլիոն օտարերկրացի է բնակվում, նրանց 9% տոկոսը դրա համար օրինական հիմքեր չունեն, և ՌԴ-ն հնարավոր բոլոր տարբերակներով փորձում է օտարերկրացիներին ներգրավել ռազմական գործողություններում։

Միգրանտների մայրենի լեզվով նաև քարոզ էր տարվում՝ առաջարկելով արագացված կարգով քաղաքացիության տրամադրում՝ կամավորագրման դեպքում, թեպետ ՌԴ օրենքը նման կետ չի սահմանում։ Այդ առաջարկը մինչ օրս էլ օտարերկրացիներին ներկայացվում է։ Սա քաղաքացիություն է՝ մահվան դիմաց, ասում է Տաթևիկ Բեժանյանը։ Որոշ հայերի ևս փորձել են խաբեությամբ ներգրավել։

Ռուսաստանում այսօր մի քանի միլիոն հայ է ապրում, և շատերն են այս օրերին լքում երկիրը։ Հայաստանում այս տարի, նախորդ տարվա նույն ժամանակահատվածի համեմատ, 3 անգամ ավելի շատ են դիմել քաղաքացիություն ստանալու համար։

Միայն 2022 թվականի 9 ամիսների ընթացքում ՌԴ քաղաքացիություն ունեցող 780․000 անձ է եկել Հայաստան։ Նրանց մեծ մասը հետո հատել է սահմանը, բայց այս պահին փաստացի մեծ թվով ՌԴ քաղաքացիներ, այդ թվում՝ հայեր, օրինական բնակություն են հաստատել Հայաստանում, կնքել են աշխատանքային պայմանագրեր, բացել մի քանի հազարի հասնող ԱՁ-ներ։

Մանրամասները՝ տեսանյութում։

Սաթենիկ Հայրապետյան