30.10.2026 | 23:02
Կասեցվել է «Նոր Զովք» ընկերության հացի և հացաբուլկեղենի արտադրամասի արտադրական գործունեությունը
Հ2 հեռուստաընկերությունը կրկին դատարան է դիմել՝ վիճարկելով Երևանում հեռարձակման լիցենզիայի հարցը
Հասարակություն
17.11.2022 | 17:31
Հայկական երկրորդ հեռուստաընկերությունը դարձյալ դատական կարգով վիճարկում է Հեռուստատեսության և ռադիոյի հանձնաժողովի որոշումը՝ փորձելով ստանալ մայրաքաղաքային սփռման իրավունք։ Այս մասին Factor.am– տեղեկանում է «Դատալեքս» դատական-տեղեկատվական համակարգից։
Հայցադիմումի հիմք է հանդիսացել Հեռուստատեսության և ռադիոյի հանձնաժողովի հոկտեմբերի 28-ի որոշումը, ըստ որի՝ «Հանրային մուլտիպլեքսում սլոթի օգտագործման լիցենզավորման մայրաքաղաքային սփռման մրցույթի հաղթող ճանաչելու և լիցենզիա տրամադրելու մասին» կետով հաղթող է ճանաչել Հայաստանի հանրային հեռուստաընկերությանը: Հ2-ը, դիմելով Վարչական դատարան, պահանջում է վերացնել հանձնաժողովի որոշումը:
Հիշեցնենք՝ Հանրային մուլտիպլեքսում սլոթի օգտագործման լիցենզավորման մայրաքաղաքային սփռման մրցույթի մասնակցության համար հայտ էր ներկայացրել երկու ընկերություն՝ «Հայկական երկրորդ հեռուստաալիք» ՍՊԸ-ն և «Հայաստանի հանրային հեռուստաընկերություն» ՓԲԸ-ն: Վարկանիշային քվեարկության արդյունքում հանձնաժողովի անդամները փակ և գաղտնի քվեարկության միջոցով գնահատել են մայրաքաղաքային սփռման մրցույթի մասնակիցներին, որոնք ստացել են համապատասխանաբար 55 և 78 միավոր: Արդյունքում հաղթող է ճանաչվել Հանրային հեռուստաընկերությունը:
Նշենք՝ Հ2 հեռուստաընկերությունը 2021թ. հունվարին կայացած հանրային մուլտիպլեքսում հանրապետական սփռման սլոթի արդյունքներով մրցույթում չէր հաղթել՝ զրկվելով լիցենզիայից: Նույն տարվա հունիսին հեռուստաընկերությունը մասնակցել էր մայրաքաղաքային սփռման սլոթի մրցույթին, սակայն կրկին պարտվել՝ վարկանիշային քվեարկության միավորով տեղը զիջելով Հանրային հեռուստաընկերության նորաբաց հեռուստաալիքին:
Ընկերությունը դիմել էր դատարան վիճարկելու Հանձնաժողովի որոշումը: Վարչական և վարչական վերաքննիչ դատարաններում ընկերության հայցը բավարարվել էր։ Անվավեր էր ճանաչվել Հեռուստատեսության և ռադիոյի հանձնաժողովի 15.01.2021թ. «Հանրային մուլտիպլեքսում սլոթի օգտագործման լիցենզավորման հանրապետական սփռման մրցույթի հաղթողներ ճանաչելու և լիցենզիա տրամադրելու մասին» որոշումը:
Հանձնաժողովը դիմել էր Վճռաբեկ դատարան՝ բողոքարկելու Վերաքննիչ դատարանի որոշումը: Սակայն, հունիսի 7-ի որոշմամբ՝ վճռաբեկ բողոքը վարույթ ընդունելը մերժվել էր:
Հիմք ընդունելով վարչական դատարանի վճիռը հանձնաժողովը հայտարարել էր հանրային մուլտիպլեքսում սլոթի օգտագործման լիցենզավորման մայրաքաղաքային սփռման նոր մրցույթ, որի արդյունքները Հ2 հեռուստաընկերթւոյունը վիճարկում է դատարանում:
Ռոզա Վարդանյան
