18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Մարիուպոլի վերապրածները. վավերագրություն, որը հակասում է պատերազմի մասին ռուսական պատումներին. VOA-ի անդրադարձը
Քաղաքականություն
13.11.2022 | 11:43
«Մարիուպոլ. Չկորած հույսը» նոր վավերագրական ֆիլմը ցույց է տալիս Ուկրաինայի պատերազմը սովորական մարդկանց աչքերով, ովքեր կարողացել են փրկվել ու գոյատևել: Այն ցուցադրվել է ԱՄՆ-ում։ Այս մասին գրում է Ամերիկայի ձայնը:
Մարիուպոլի բնակիչները հիշում են, թե ինչպես սկսվեց Ռուսաստանի ներխուժումը, իրենց խոսքերով` պատկերելով պատերազմի իրականությունը։
Նրանց մասին պատմող «Մարիուպոլ. չկորած հույս» վավերագրական ֆիլմի պրեմիերան տեղի է ունեցել Նյու Յորքում:
Ֆիլմում նկարահանված բժիշկ և կամավոր Ջիլիան Զելդինը երեք ամիս աշխատել է փախստականների օգնության կենտրոններում՝ ուկրաինա-լեհական սահմանին:
Նա նաև ուկրաինացի զինվորականներին սովորեցրել է, թե ինչպես է հարկավոր օգնել վիրավորներին մարտական գործողության ժամանակ:
«Ես ուղղակի չէի ուզում այս ամենից հեռու մնալ։ Ես գնացի և տեսա բազմաթիվ հիվանդների: Աշխատել եմ այնտեղ ծառայող իսրայելից ժամանած բժիշկների երկու խմբերի հովանու ներքո»,-պատմել է նա։
Ռոման Գորոդենսկին Մարիուպոլի պաշտպաններից էր։ Այնտեղ կորցրել է ձեռքն ու ոտքը և գերվարվել ռուսների կողմից։ Գորոդենսկին ասում է, որ իրեն խոշտանգել են և ազատել գերիների փոխանակման ժամանակ: Այժմ նա վերականգնողական փուլ է անցնում ԱՄՆ-ում։
«Հուսով եմ, որ շուտով նորմալ կքայլեմ, ձեռքս ու ոտքս էլ նորմալ կաշխատեն։ Այնուհետև, կարծում եմ, որ նորից կմիանամ Ուկրաինայի զինված ուժերին»։
Վավերագրական ֆիլմը հիմնված է Մարիուպոլի լրագրող Նադեժդա Սուխորուկովայի գրառումների և ռուսական օկուպացիայի առաջին ամիսներին Մարիուպոլի բնակիչների օրագրերի վրա։
Ֆիլմը, որը արտադրվել է ուկրաինական պրոդյուսերների կազմակերպության կողմից, ընդգծում է ճշմարտությունը ռուսական ամբողջ ապատեղեկատվության ներքո, ասում է ֆիլմի ռեժիսոր Մաքս Լիտվինովը. «Նրանք փորձում են տարածել Եվրոպայում, թե ինչու է այս պատերազմն արդար և ինչ պատճառաբանություններ ունեն: Մենք պարզապես գիտեինք, որ պետք է ցույց տանք ճշմարտությունը, որը կկանգնի այդ բոլոր ստերի դեմ»:
Ուկրաինացիները վավերագրական ֆիլմում ասում են, որ աշխարհը պետք է իմանա և հիշի Մարիուպոլում տեղի ունեցածը:
Մարիուպոլի քաղաքապետ Վադիմ Բոյչենկոյի խոսքով՝ «Մեզ համար կարևոր էր թույլ տալ, որ բարձրաձայնվի քաղաքացիների խոսքը՝ մայրիկիս և տատիկիս և տասնյակ հազարավոր մարդկանց ձայները, ովքեր փրկվել են այս ողբերգական պատերազմից»:
Ուկրաինացի պաշտոնյաներն ասում են, որ ֆիլմում ցուցադրվում են նաև ռուսական ռազմական հանցագործությունների ապացույցներ:
Մարիուպոլի քաղաքապետը վստահ է՝ «Այս վավերագրական ֆիլմը կօգտագործվի Հաագայում քրեական դատավարության ժամանակ: Ես կանեմ ամեն ինչ, որպեսզի դա տեղի ունենա»:
«Ասա ճշմարտությունը իմ քաղաքի մասին», – լրագրող Նադեժդա Սուխորուկովայի այս գրառումով եզրափակվում է վավերագրական ֆիլմը և ամփոփում ուկրաինացի փրկվածների հույսը:
