Ասել` ադրբեջանցիներն ու հայերը իրար հետ չպետք է շփվեն, ճիշտ չի. Փաշինյանը` անցակետերում աշխատանքը կազմակերպելու մասին. ՏԵՍԱՆՅՈւԹ

«Եթե մենք գնում ենք տարածաշրջանում խաղաղություն հաստատելու օրակարգը սպասարկելու (իսկ իմ կարծիքով՝ մենք պետք է գնանք այդ ճաապարհով) ապա ասել, թե ադրբեջանցիները հայաստանցիների հետ պետք է չշփվեն, իսկ հայաստանցիները՝ ադրբեջանցիների հետ, այդքան էլ ճիշտ չէ»,- Հանրային հեռուստաընկերության հետ հարցազրույցում այս մասին նշեց վարչապետ Նիկոլ Փաշինյանը։

«Այդ շփումները պետք է կազմակերպվեն։ Մենք կարծում ենք, որ ի վերջո, պետք է վերադառնանք ամենապարզ տարբերակին, որ Ադրբեջանի սահմանին հսկողություն իրականացնում են ադրբեջանցի ծառայողները, Հայաստանի սահմանին՝ հայաստանցիները»,- նշեց Փաշինյանը։

Մանրամասնելով, թե ինչ նկատի ուներ, երբ կառավարության նիստի ընթացքում հայտարարեց, որ Հայաստանն ու Լեռնային Ղարաբաղն Ադրբեջանին առաջարկել են ստեղծել ապառազմականացված գոտի, Ադրբեջանին փոխանցել է նոր տարբերակ, վարչապետը նշեց, որ ՔՊ-ի համաժողովի ընթացքում է առաջարկել, որ եթե, այնուամենայնիվ, այդ խնդիրը չի հաղթահարվում, ապա պետք է օպերատորների պատվիրակել։

«Ասացի, որ մեր կողմից օպերատորը կարող է լինել ՌԴ սահմանապահ ծառայությունը։ Հայկական կողմն առարկություն չունի, որ Ադրբեջանի կողմից այդ օպերատորը լինի Թուրքիայի սահմանապահ ծառայությունը։ Եթե դա էլ ընդունելի չէ, ապա պետք է վերադառնալ առաջին տարբերակին և տեսնել, թե այն ինչպես կարելի է կազմակերպել․․․»։

Փաշինյանն ընդգծեց, որ եթե Ադրբեջանի համար սա իսկապես հաղորդակցության հարց է և ոչ թե էսկալացիայի առիթ գտնելու, ապա այդ հարցը գործնականում լուծված է․ «Պետք է ընդամենը առկա պայմանավորվածություններն արձանագրել և գնալ առաջ»։

Մանրամասն՝ տեսանյութում։