23.11.2024 | 12:12
Վերադարձի՛ր շարք․ ՊՆ սոցիալական հոլովակը
Անիում նոր ընտրություններ կանցկացվե՞ն․ «Հայկական երազանքը» բոյկոտում է ավագանու նիստը
Քաղաքականություն
11.11.2022 | 11:48
Այսօր Շիրակի մարզի Անի խոշորացված համայնքում կկայանա ավագանու անդրանիկ նիստը, որի ժամանակ էլ կընտրեն համայնքապետ։
«Հայկական երազանք» կուսակցությունը, որը ստացել է ընդամենը երեք մանդատ, չի մասնակցի նիստին՝ այսպիսով ցույց տալով, որ չի միանալու մյուս երկու քաղաքական ուժերից և ոչ մեկին։
Այս մասին մեզ հետ զրույցում հայտարարեց «Հայկական երազանք» կուսակցության ցուցակը գլխավորող Ագուն Սաղաթելյանը։
Հիշեցնենք, որ Անիում ՏԻՄ ընտրություններին մասնակցել են երեք քաղաքական ուժեր։ Ազգ-համայնք» դաշինքը, որը գլխավորում է 18 տարվա ՀՀԿ-ական համայնքապետ Արտակ Գևորգյանը, ստացել է 10 մանդատ։ ՔՊ-ն ստացել է 8 մանդատ․ցուցակն առաջնորդում է «Հայ Փոստի» տեղի պատասխանատու Արման Սարիբեկյանը, իսկ նորաստեղծ «Հայկական երազանք» կուսակցությունը՝ 3 մանդատ։
Երեք ուժերից և ոչ մեկը չի կարող միանձնյա իշխանություն ձևավորել։ ՔՊ-ն հայտարարել է, որ կոալիցիա չի կազմի գործող համայնքապետ Արտակ Գևորգյանի գլխավորած «Ազգ-համայնք» դաշինքի հետ։ Ագուն Սաղաթելյանն էլ իր հերթին պատրաստ է կոալիցիա կազմել այն դեպքում, եթե այս ուժերից որևէ մեկը համաձայնի համայնքապետի պաշտոնում իրեն առաջադրել։
Եթե այսօր համայնքապետ չընտրվի ու իշխանություն չձևավորվի, ապա հարցի լուծման համար երկշաբաթյա ժամկետ է մնում։ Այս ընթացքում իշխանություն չձևավորելու դեպքում, ըստ ՏԻՄ օրենքի, վարչապետի հրամանով կնշանակվի համայնքապետի ժամանակավոր պաշտոնակատար, այնուհետ՝ նոր ընտրություններ։
Արմիկ Մովսիսյան
