11.12.2025 | 11:02
Կառավարության նիստը՝ ՈՒՂԻՂ
Օրենսդրական փաթեթով կկարգավորվեն գեոդեզիական եւ քարտեզագրական գործունեության աշխատանքները. ՀՀ կադաստրի կոմիտեի ղեկավար
Տնտեսություն
09.11.2022 | 16:08
«Գեոդեզիական եւ քարտեզագրական գործունեության մասին» եւ կից նախագծերի փաթեթով առաջարկվում է կարգավորել գեոդեզիական եւ քարտեզագրական գործունեության աշխատանքները, սահմանել գեոդեզիայի եւ քարտեզագրության բնագավառում ՀՀ գործադիր իշխանության հանրապետական եւ տարածքային կառավարման, տեղական ինքնակառավարման մարմինների եւ այլ սուբյեկտների իրավասությունները, միջազգային համագործակցության, տարածական տվյալների ոլորտում վճարների, ինչպես նաեւ վեճերի լուծման կարգը եւ օրենքը խախտելու համար պատասխանատվությունը. տեղեկացնում են ՀՀ ԱԺ-ից։
ՀՀ կադաստրի կոմիտեի ղեկավար Սուրեն Թովմասյանը նշել է, որ նախագծերի փաթեթով սահմանվում են նաեւ տարածական տվյալների ստեղծման եւ մշակման աշխատանքների ցանկերը, տարածական տվյալների եւ դրանց առնչվող ծառայությունների տրամադրման եւ օգտագործման համար գանձվող վճարները, արտոնությունները, մետատվյալներին առնչվող հարցերը, ինչպես նաեւ առաջարկվում է ներդնել ազգային տարածական տվյալների ենթակառուցվածք, որի տարր է ազգային գեոպորտալը՝ տարածական տվյալների ենթակառուցվածքները միավորող համակարգը:
«Առաջին անգամ դասակարգվել են գեոդեզիական եւ քարտեզագրական համապատասխան ֆոնդերը»,- ասել է Սուրեն Թովմասյանը:
Նշվել է, որ ներկայումս պրակտիկայում գործում են տարածական տվյալների ստեղծման եւ օգտագործման չկարգավորված հարաբերություններ, ինչն էլ դարձել է պատճառ նախագծերի փաթեթի մշակման համար, որոնք միտված են կարգավորելու գեոդեզիայի, քարտեզագրության, ինչպես նաեւ տարածական տվյալների ոլորտները:
ՀՀ կադաստրի կոմիտեի ղեկավարի հավաստմամբ օրենսդրական փաթեթով կսահմանվեն վճարների այն տեսակները, որոնք պետք է գանձվեն համապատասխան մարմինների կողմից՝ պետական տարածական տվյալների ֆոնդի տեղեկատվության տրամադրման եւ դրանց առնչվող ծառայություններից օգտվելու համար: Սահմանվելու են նաեւ նոր վճարների տեսակներ (դրանք 12-ն են), որոնց դրույքաչափերը տատանվում են 1000-ից մինչեւ 80.000 դրամի սահմաններում:
«Ազգային գեոպորտալի թողարկումը հնարավորություն կտա ուղղել երկրում առաջին քարտեզագրման բոլոր սխալները»,- նշել է Սուրեն Թովմասյանը:
ԱԺ աշխատակազմի փորձագիտական եւ վերլուծական վարչությունը փաթեթի վերաբերյալ ներկայացրել էր մի շարք նկատառումներ: ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանն առաջարկել է Կադաստրի կոմիտեին ԱԺ մասնագետների հետ առաջին ընթերցումից հետո քննարկել բոլոր խնդրահարույց դրույթներն ու գտնել համապատասխան լուծումներ:
Հանձնաժողովը դրական եզրակացություն է տվել նախագծերի փաթեթին:
Օրենսդրական փաթեթը քննարկվել է նոյեմբերի 9-ի ԱԺ տնտեսական հարցերի մշտական հանձնաժողովի նիստում:
