31.10.2026 | 22:55
Հայտնաբերվել է զինծառայողի դի. ՊՆ
Զելենսկին անվանել է ՌԴ-ի հետ բանակցությունների պայմանները՝ չնշելով Պուտինի հեռացումը․ Politico
Քաղաքականություն
09.11.2022 | 17:39
Ուկրաինայի նախագահ Վլադիմիր Զելենսկին որոշակիորեն մեղմել է իր դիրքորոշումը Ռուսաստանի հետ խաղաղության բանակցությունների հեռանկարի հետ կապված՝ ԱՄՆ իշխանությունների հետ բանակցություններից հետո։ Այս մասին գրում է Politico-ն՝ վկայակոչելով իր աղբյուրներին, փոխանցում է BBC-ի ռուսական ծառայությունը։
Ամերիկյան լրատվականը հիշեցնում է Զելենսկիի երկուշաբթի օրվա ելույթը, որում նա թվարկել է ՌԴ-ի հետ խաղաղության հիմնական պայմանները․ Ուկրաինայի տարածքային ամբողջականության վերականգնում, ՄԱԿ-ի կանոնադրության հարգում, պատերազմի ընթացքում հասցված վնասի փոխհատուցում, հանցագործությունների բոլոր մեղավորների պատժում, երաշխիքների տրամադրում, որ պատերազմը չի կրկնվի։
Ըստ հրապարակման՝ Զելենսկին չի հիշատակել, որ բանակցությունները Մոսկվայի հետ կարող են տեղի ունենալ, եթե նախագահ Վլադիմիր Պուտինը հեռացվի իշխանությունից։
«Աղբյուրներից մեկի խոսքով՝ փոփոխությունը տեղի է ունեցել Կիևի և Վաշինգտոնի միջև մի քանի օր տևած բանակցություններից, այդ թվում՝ ազգային անվտանգության հարցերով խորհրդական Ջեյք Սալիվանի՝ Զելենսկիի հետ անձամբ հանդիպումից հետո»,- գրում է պարբերականը։
ԱՄՆ վարչակազմի բարձրաստիճան պաշտոնյայի խոսքով՝ ամերիկացի պաշտոնյաները Զելենսկիին և նրա խորհրդականներին ուղիղ չեն խնդրել դիրքորոշման փոփոխություն հարցում, սակայն փոխանցել են, որ Կիևը պետք է ցուցաբերի պատերազմը ավարտելու ցանկություն՝ խելամիտ ու խաղաղ պայմաններով։
Զելենսկին նախկինում բազմիցս ասել է, որ մտադիր չէ բանակցել Ռուսաստանի գործող նախագահի հետ այն բանից հետո, երբ Կրեմլը փորձեց միացնել ուկրաինական չորս շրջանները: Ուկրաինայի իշխանություններն այս սկզբունքի փոփոխության մասին չեն հայտնել։
Ամերիկյան լրատվականներն էլ ավելի վաղ գրել էին, որ Սալիվանը Զելենսկիին առաջարկել է ցուցաբերել խաղաղության պատրաստակամություն՝ միջազգային հանրությունն իր կողմը գրավելու համար։ Միաժամանակ, լրագրողները նշում են, որ Վաշինգտոնը չի ձգտում Կիևին ստիպել գնալ որևէ զիջումների։
Էմմա Չոբանյան
