ՀՀ-ն չպիտի՛ զոհաբերվի՝ հանուն ՌԴ-ի կայսերապաշտ ծրագրի․ ծաղրածու Լուկաշենկոյի ճանապարհը չկրկնե՛լ․ Ռուբեն Բաբայան․ ՏԵՍԱՆՅՈՒԹ

Այսօր աշխարհակարգը լուրջ ցնցումների է ենթարկվում՝ միջազգային իրավունքի և նորմերի վրա հարձակում է բռնապետական ռեժիմների կողմից՝ Էրդողան, Ալիև, Պուտին։ Մյուս երկուսը՝ մեր դեմ, իսկ Պուտինը Ուկրաինայի դեմ պատերազմով հավակնում են ապացուցել «ուժն է ծնում իրավունք» բանաձևի կենսականությունը։ Այսինքն՝ Պուտինի դեպքում գործում է՝ «Ես ունեմ ատոմային զենք, ուրեմն՝ կգրավեմ Ուկրաինան» սկզբունքը։ Հիտլերը ևս այդ բանաձևով սկսեց 2-րդ համաշխարհային պատերազմը, իհարկե՝ ոչ ատոմային զենք ունենալով, բայց ֆաշիստական գաղափարներ դնելով քաղաքականության հիմքում։

Ռեժիսոր Ռուբեն Բաբայանը Factor TV-ին տված հարցազրույցում պնդում է, որ Պուտինի տոտոլիտար ռեժիմը հանուն ցնորամիտ գաղափարների իրականացման զոհաբերում է իր քաղաքացիներին՝ չխնայելով նրանց կյանքը, հազարավոր ռուսների ուղարկելով մսաղացի բերան։ Այս իմաստով, ռուս-ուկրաինական պատերազմն ավելի շուտ քաղաքակրթական պատերազմ է, երբ բռնապետական ռեժիմը հարձակվել է ժողովրդավարական պետության վրա։ Իսկ ինչպե՞ս վարվել կայսերական շրջանը կամ ԽՍՀՄ-ը վերականգնելու մտքերով տարված ՌԴ ներկա ղեկավարության հետ, երբ Միութենական պետության պարտադրանք կա, այդ թվում՝ ՀՀ-ի հանդեպ։ Ո՞րն է հարաբերությունների ընդունելի այն բանաձևը, որ պետք է լինի նախկին գաղութների՝ 14 հանրապետությունների և նախկին կենտրոնի՝ Կրեմլի միջև։

Ռուբեն Բաբայանի համոզմամբ՝ Հայաստանը պետք է ինքն իրեն չզոհաբերի հանուն ՌԴ-ի կայսերական գաղափարների իրականացման, ապահովի ինքն իր անվտանգությունը և զգուշանա ծաղրածուի վերածված Լուկաշենկոյի ճակատագիրը կրկնելուց։ Լինելով բռնապետական ՀԱՊԿ-ի անդամ և ունենալով անընդունելի արժեհամակարգով դաշնակիցներ՝ ՀՀ-ն չի ստանում անվտանգություն, և իրերի այդ դրության պայմաններում սխալ է գլխին խփել, թե ինչու չօգնեցին։ Ըստ Ռուբեն Բաբայանի՝ ՀՀ-ում պետք է մեզ հարց տանք՝ ումից ինչ ենք պահանջում, և վերափոխենք արտաքին քաղաքականությունը՝ գտնելով իրական գործընկերություն ժողովրդավարական պետությունների ընտանիքում։

Հարցազրույցն ամբողջությամբ՝ տեսանյութում։

Ռոբերտ Անանյան